Кьуръандалуву кIицI лавгсса цIуку
Кьуръандалуву кIицI лавгсса цIуку
Аьламраву бур аьдад-ккал так ца Аллагьнан ﷻ дакъа къакIулсса цIуртти. Кьуръандалуву бувсун бур баргъ ва барз ляхъан бувма – Аллагь ﷻ ушиву. Вай бакъасса, цамургу цIуку кIицI лавгун бур Аллагьнал ﷻ луттираву.
«Ан-Нажм» тIисса суралул 49-мур аятраву увкуну бур (мяъна): «Аллагь – ттурши-цIукул (Сириусрал) Заллури».
ХьхьичIазаманнай, аьвамсса аьрабтал бивкIун бур Сириусрайн икрам буллай, га ляличIисса цIукуну ккалли байсса бивкIун бур. Масала, Мисриллал (Египетнал) агьулданун ттурши хIисавну бивкIссар цала фараонтуран гъансса цIукуну, ссавруннайсса «уссуну». Мунияту пирамидардаву чIавахьулттугума бувайсса бивкIссар, гивусса фараоннан цала «уссу» чIаланшиврул.
Тафсирдаву кIа аят бувчIин буллай увкуну бур: «Аллагьу Тааьланал ва цIуку ляличIину кIицI лавгссар, га заманнай аьрабтал ганийн икрам буллай бивкIунтIий. Шикку Заннал баян бувну бур Сириусралгу, гьарзадралгу Зал Цува ушиву, ва Цайнма бакъа щийнчIав ва ссайнчIав икрам буллан къабучIишиву.
