Дуаьлуву кару гьаз даврия
Дуаьлуву кару гьаз даврия
Цаппараннал учай кару хьхьичIун къадургьуну дурсса дуаь къахIисавссар, къакьамулссар, куну. Вайми бястру буллан бикIай, дуаь дуллалисса чIумал кару хьхьичIун дугьан ягу лажиндарайх дуккан къабучIиссар тIий.
Салман Фарисил бувсун бур укунсса хIадис (мяъна): «Аллагьнан ﷻ нач шайссар каругу гьаз дурну хьхьичIун дургьуну Цайнна леххаву увкусса инсан цичIав къадуллуну пашман ан». (Тирмизи, Абу Давуд, Ибн Мажагь).
Хъунасса аьлимчу Ибну ХIажар Гьайтамил «Аль-Фатава́ аль-Фикьгьия аль-Кубра́» тIисса луттираву вай мукъурттил хIакъираву чивчуну бур: «Чакливу ягу чаклиха лархьхьусса эбадатирттаву личIаннин, цамур чIумал дуаь дуллалини кару хьхьичIун дугьаву суннатссар. Идавсил ﷺ мукун дугьайссия кару так гъарал чIа учаврил дуаьлуву тIутIима щак бакъа аьйкьуссар».
Чакливу акъасса чIумал дуаь дуллалиманан суннатссар кару хьхьичIун дугьаву, му ишираву Идавсил ﷺ ххуллу бувгьуну. Ванил хIакъиравусса хIадис бувсун бур кIиягу имамнал (Бухарил ва Муслимлул) ва цаймигу имамтурал щак бакъасса иснадирттайну. Гай хIадисирттаву бувчIин бувну бур Идавсил ﷺ заманнай мукунсса ишру (кару хьхьичIун гьаз дурну дуаь даву) цимилвагу хьушиву, хаснува гъарал чIа учайни ва цаймигу кIанттурдаву, "Аль-Мажмуъ" тIисса луттираву бувчIин бувсса куццуй.
Имам Нававил «Аль-мажму́ъ ШархI аль-Мугьаззаб» тIисса луттираву, дуаь даврил адаврая бусласисса кIанай чивчуну бур: «Дуаь даврил адавну ккаллиссар мубараксса чIунну ва дуаь кьамул шайсса кIантту хIисавравун ласаву, Кьиблалул чулинмай кIура баяву, кару хьхьичIун гьаз даву ва лажиндарайх дуккаву. Ялагу – баянсса чIуний чIа учаву, амма хъиннува лахъ къабувну».
Ялув чивчумунива жунма бувчIлай бур дуаь дуллалисса чIумал чара бакъа кару дугьан аьркиншиву дакъанугу, му хъанахъишиву Заннайн леххаву тIисса чIумал биттур дан аьркинссар адавну, дурну хъинсса давуну.
Буссар кару гьаз къадурну дуаь дайсса кIанттурдугу, масала, хутIба буллалисса имамнал, чаклил суждалуву дуаь дуллалиманал, «аттахIийятулул» хъиривсса дуаьлуву ва м.ц. хасъсса кIанттурдаву.
