ЛяличIисса цинцилтту
ЛяличIисса цинцилтту
Кьиямасса кьини инсаннал дурсса циняв тIуллу, аьмаллу хIисав бувантIиссар, царагу чIирисса даву лях личIан къадитантIиссар. Хъинсса ва оьсса аьмаллу буцинтIиссар Мизан тIисса ляличIисса цинцилттай. Му чIумал бюхъайссар ца чIирисса тIулдануву хъуннасса агьамшиву лякъин, цания-ца чулиннай цинцилтту кIу дурну. Муниятури диндалувусса гьарца тIалавшин чара бакъа биттур дуллан аьркинсса, чIирисса дурча увкуну пикрибакъашиву къадуллай.
ХIасаннул бувсун бур: «Ца чIумал Аьишат аьтIун бивкIукун, Идавсил ﷺ ганихь цIувххуну бур: “Циван аьтIий бура?” – куну. “Дужжагьрал ЦIу дакIнин дагьну аьтIий бура на. Вин вила гъан-маччами дакIнин багьанссарив уттава бувантIисса (Кьиямасса) Кьини?” Идавсил ﷺ увкуну бур: “Шанма кIанттай щинчIав цIучIав дакIний къаикIантIиссар: Мизан-цинцилтту цумур чулиннай кIу хьуссарив кIул хьуннин, аьмаллал даптар цумур чулуха булунтIиссарив кIул хьуннин ва Дужжагьрал ялтту бивхьусса СиратIуллал ламуйх лахъан хьунтIишиву кIул хьуннин”». Хъинсса тIуллу оьминнуяр ххишалану лявкъуминнан аьмаллал даптарду булунтIиссар хьхьичIа ва урчIамур чулуха. Гьарманал цIа увкуну Алжаннул неъматирттал ххари бувантIиссар. Ми Дужжагьрая ххассал хьунтIиссар. Цала оьсса аьмаллан лайкьсса танмихI миннан бувантIиссар гьаттаву, Кьиямасса кьини ва СиратIуллал ламуйх лахъайний. Оьккисса тIуллу хъинминнуяр гьарза хьуминнан даптарду булунтIиссар ттиликIрал махъа. Минналгу гьарманал цIарду увкуну, Дужжагьрал цIаравун бичинтIиссар.
Анаслул t бувсун бур Идавсил ﷺ увкумур: «Кьиямасса кьини Адамлул арс (инсан) увцуну бувкIун, Мизан-цинцилттал дянив ацIан увантIиссар, мунал чIаравгу малаик ацIантIиссар. Мунал хъинсса аьмаллу бумур чул цинцилттай кIу хьурча, малаикнал бюхттулсса чIуний баян бувантIиссар: “Пулансса инсан талихIрайн увккунни, ва талихIрая махъ дард-буруккин бакъассар”. Хъинсса тIуллу думур чул лавай гьаз хьурча, малаикнал баян бувантIиссар: “Пуланнал дард ккурхIунни, ванияр махъ ванан талихI бакъассар”. Яла бучIантIиссар муххал мархьру кIунттихьсса, цIарал лаххиярдавухсса Дужжагьрал аьрал. ЦIаран лайкь хьумур миннал ЦIаравун буцинтIиссар».
«Исламраву бивкIу буччаврил аьдат» тIисса луттирава
