МасхIу баву (хуффайни)
Аллагьу Тааьланал жунна дин даву бигьа-куклу буваншиврул, дяркъусса чIумал, ягу сапарданий ухьурчан, ягу махIсив ликкан къаччай ухьурчан, масхIу буван ихтияр дуллуссар.
Шава уманан хьхьу-кьини, мусафирнан шанна хьхьу-кьини буван бучIиссар. Му сафаргу лахъисса, чак кутIа буван бюхъайсса, бунагь-аьсившиву дакъасса бикIан аьркинссар. КутIасса сафар бухьурчан, ягу лахъинугу бунагьсса бухьурчан, ца хьхьу-кьини бакъа буван къабучIиссар.
МасхIу буваврил цаппара шартIругу дуссар: масхIу байсса махIсив марцIсса, чаклийн дурусъсса бикIан аьркинссар, нажасъсса задрайх бан къабучIиссар. ЦIакьсса, аьркиншиврий лавххун ачин бюхъайсса бикIан аьркинссар. Ялун щин дутIирча вив къадуккайсса бикIан аьркинссар. Хъиннува кIюласса къабучIиссар. Щавщсса задрал бикIан къабучIиссар, мунивух дутIайхту щин дуккайнутIий, амма щавщсса бунугу, щин къадуккайсса бухьурча, мугу бучIир, масала, цIакьсса варсул махIсив кунмасса. Бурувххусса кIанайх, ххалаххул ккутIавух чан-кьансса щин дуккаврил зарал бакъассар. Хъиннува ганзсса, хъиннува гьартасса, хъиннува къумасса, ачин къабюхъайсса бикIан къабучIиссар. Кьюрщулттив бахьлавгсса бикIан аьркинссар. ХIалалсса бикIан аьркинссар, хIараммунийх масхIу бан къабучIиссар. Цаннил ялтту ца лаххан къабучIиссар, кIивайвагу масхIу буван бучIисса бухьурчан, амма цавай бучIисса, гайми къабучIисса бухьурчан бучIиссар. Жулва кIанттурдай бурчул махIссайх масхIу бувайсса аьдат дур.
МасхIу цуппагу чаклийн иссайхту лаххан аьркинссар акъавцIуну. Куямур ччан шюшиннин урчIамур лаххан къабучIиссар. Чаклийн иссаву къуртал шайхту акъавцIуну кIивагу аьрхIал лаххан аьркинссар. Мунил чIунгу дай дишайссар чаклингу ивссуну, мяхIсивгу лавххун, ялагу чаклин иссаву зия шаврияту тихунмай.
МасхIу бувайсса куцгу: чанма-чанмур, фаризамур – дахьра марцIсса щинал ялтту ка дурккун кьаритавури, суннатмур куц – цал цIусса, марцIсса щин ларсун каруннайн, яла куямур ка ччаннал никъурал лув дирхьуну, урчIамур ка ччаннал кIиссурттал бакIрай ялув дирхьуну, куямур кIиссурттал чулухуннай, урчIамур кьюршулттал чулухуннай дуккавури, кIисригу тIитIин бувну, щинал ххару-ххару бувну махIссайх.
МахIсив лавххун уна щин ялув хьурчангу ливккун, гъуслугу бувну, чаклингу ивссуну цIуницIа лавххун байбишинссар. ЧIун къуртал хьурвав тIий щак хьурчан, ливккун цIунил ивссуну байбишинссар. ЧIун дияннин хъама бивтун махIсив ликкарчангу, чаклин ивссуну уна, ччанну шюширчангу гьассар. Чаклин ивссуну акъасса чIумал ликкарчарив, тамамну чаклин иссун ялувссар. ИчIува масхIу буллай ивкIун яла сапарданий ачин багьарчан, ягу сапарданий буллай ивкIун, шавайн иярчан ца хьхьу ва кьини бувайссар. Амма чув ухьурчангу ливккун ччаннугу шювшюну иссаву ххирассар масхIу бавунияр. МасхIу баву буллуссар захIмат къахьун, бигьа буван. Мукун бавунияр бюхъавай щаллуну баву хъинссар.
