НицIавкIратусса шайх Сайфуллагь-Кьадинал насихIатру
НицIавкIратусса шайх Сайфуллагь-Кьадинал насихIатру
Дагъусттаннал Муфтиятрал ита бавкьусса «Шейх Сайфулла-Кади Башларов. Жизнь и творчество» тIисса луттирава
Суфий – цала дакI марцI дурсса ва Аллагь ﷻ рязи увсса инсанни.
КуртIсса хьхьиривун агьманал ххассал шаврия бакъа цамур пикри къабикIайсса кунма, Зал кIул шаврил хьхьиривун увхманалгу цала Занная бакъа пикри къабувайссар, мунан Аллагь ﷻ акъа цамур цичIав къакIулссар, хIисав къашайссар. Абуязид Бастамил увкуссар: «Цу-унугу вияра лагьну чIалачIаву – дакI хъуншивури». Цанчирча вин къакIулссар вила оьрмулул ахир цукунсса хьунтIиссарив. ТIарикьатрал ххуллу бугьаврил мурад – Идавсил ﷺ тIабиаьт, хасият лархьхьуну, оьрмулуву ганал ккаккан бувсса ххуллийх бачаву. Аьямсса элмурду мурхьираха лархьхьуссар, кьюлтIсса элмурду – ахъулссаннуха лархьхьуссар. Жува мурхьиран кьимат буллай бухьурчагу, ганиясса мюнпат ахъулссаннул мюнпатрал чIарав къабацIайссар. Чурххан ягу хъуслин бивсса зарал вин чIалай бур мусиватну. Чурхру хIайвантралгу буссар.
Яла оьккимур – рувхIанийсса, дакIнищал бавхIусса бивкIури. ХьхьичIавасса салихIинтал цанин бувкIун бур тIайлабацIу хьун бюхъайшиву так элму лахьхьаврийну ва миннуйн лайкьсса багьубизулийну. Вила усттаз (шайх) инава ххассал шаврил кьиблану ити, тиху-шихунай мауругларда. СалихIсса инсаннащал хьуна акьаврия хайр биянтIиссар минная ххуйсса пикри ва адав духьурча. ДакIнил рувхIанийсса цIуцIавуртту хъин даву – муриднал буржри. ТIул (аьмал) – элмулул ахъулссари, аьмал бакъасса элму лархьхьуссар ахъулсса дакъасса мурхьираха.
Диндалул уссия ххуйсса бакъа махъ маучара, хаснува сситтуву личIлулну икIу. Инсан мудан цала дакIнил хъирив авцIуну икIан аьркинссар. Хъунисса бунагьирдахун агьсса инсаннащал дусшиву мадувара, цанчирча вин мунаяту ххуй дакъасса тIуллу лахьхьинтIиссар. Мукунсса инсаннахь вила дакIнил кьюлтIмургу мабусара.
