«Таслим» ва «тафвиз»
Занная ﷻ рязишиврул, мютIи шаврил (таслим) ва циняв давуртту Аллагьнайн ﷻ тапшур даврил (тафвиз) мяъна
КIулну икIу, рязишиву му – Аллагьнал ﷻ чивчумуния цукунчIавсса рязи акашиву къадавури, вила ялун цукун захIматсса бала биярчагу. Лагънал чара бакъасса буржри хъанахъимунива так рязи хьун бучIимуний рязи шаву. Цанчирча, Заннал чичрулийну хъанахъисса гьарца иширай рязшиву дуллан къабучIиссар, масала бунагьрая.
Рязишиву – дакIнива цимурца рязи акъашиву дуккан дурну, миву так ххаришиву ва дузалшиву личIавури. Цамур куццуй учин, Заннал бувсса хIукмурдал хIакъираву дакI паракьатну дитан, Аллагь ﷻ рязимуния ва Цала лагънан нясив бувмуния рязи хьун аьркинссар. Мукунсса рязишиврул лишангу, Аллагьнал ﷻ чивчумур бучIаннин инсаннахь цукунчIавсса ихтияр дакъашиврий дакI дацIан даву ва нясивмур бучIайхту рязи акъашиву къадавури. Ялагу ца лишан – ялун ци захIматшиву диярчагу, Аллагьнахсса ﷻ ччаву чIалачIи давури. Щак бакъа, имандалул нацIушиву кIул хьунтIиссар так Аллагьная ﷻ рязиманан. Мунил нацIушиврул тIин кIул къашайссар дакIниву дунияллул хъусхъиншиврунсса кIану буманан.
Рязишиву кIива бутIуйх дачIайссар: аьдилсса низам дирхьуманая – Аллагьная ﷻ – рязину икIаву ва Заннал бувсса циняв хIукмурдай рязи шаву. Аллагьная ﷻ рязисса инсаннал дакIниву цайнна дирсса чичрулий рязи акъашиву къадикIайссар. Заннал Цала лагънан так яла ххуймур нясив бувайшиврий дакI дарцIума уссар цанма чивчумур бувкIун дакIнихтуну ччай. Тафвиз ва таслим ласурча, му цала ихтиярдания махъунай хьуну, щаллуну Аллагьнал ﷻ биялалийн мютIи шавури. Таслим, ислам ва истислам – ца мархха бусса махърури, миннул гьанусса мяънагу – Аллагьнайн ﷻ мютIи шаву ва Заннал хьхьичI вила лагъсса тагьар аьч давури.
Тафвиз – дунияллул иширттаву ца чул бугьаву бакIрайн къаласаву, Заннайн щаллуну таваккал бутаву ва Аллагьнал ﷻ язи дургьумунищал къадакьлакьимуния айщаву хъанахъиссар. Тафвиз бикIайссар Заннал нясив бувсса иш ялун бияннин, таслим дикIайссар му иш хьуну махъ. Тафвиз ва таслим – Аллагь ﷻ кIул увминнал хасиятирттавун дагьайссар.
«САЛИХIМИННАЛ ТIАБИАЬТ» ТIИССА ЛУТТИРАВА
