Кулпат баврил адавру
Кулпат баврил адавру
Аллагьу Тааьланал инсантуран цалва неъмат ххишала буван, цалва наслугу ххишала буван, дуниялгу халкь-аьлам, инсантал бакъа къаличIан, цалва-цалва наслу-авладгу махъ бацIан инсантураву щар дуцаву дачин дурссар. ХьхьичIра-хьхьичI ХIава Адамлун щарну буллуну.
Утти мукун бухьувкун, щарсса дурцуну ядуван тIакьат (каши) дусса, мунин цайва ялувмур чурххал чулуха бикIу, нафакьа-кисватрал (дукиялул, лаххиялул) чулуха бикIу, гьарца ласнай щарсанин ялувсса хIукьукьру тIайла буккан бюхъайсса адиминал щарсса дуцаву суннатссар. Щарсса дуцавугу эбадатри, цалва чурх буруччин ниятрай дуцирча. Мунийну дингу, чурхгу, яругу буруччайссар, щяйтIаннул вас-васирттая уруччайссар, хIатта диндалул дачIи мунийну дуруччайссар. Щар дурцуманал ца чак ххирассар къадурцуманал мукъцIалванияр. Щар дурцусса ца кьини хъинссар азарда шинайсса эбадатнияр. Щар дурцукун, наслу гьарза шайссар. Наслу гьарза хьувкун, эбадат гьарза шайссар – яла хъунмур мурадгу мури.
ХIатта цаягу идавс щарсса къадурцусса къавхьуссар, Иса личIаннин. Муналгу ссаврунная ливккукун дуцинтIиссар. Идавстурал паччахIнал Расулуллагьналгу ﷺ пахру бувссар цалва уммат чIявушиврий. ЧIявушиврин сававгу щар дуцавур. ХIатта щар къадурцуна тIааьт-эбадатрахун машгъул хьунунияр дуцаву суннатссар. Мунийнусса мюнпатру чIявуссар: хъуслил мулкирал заллухъру хьуну, наслу махъ личIайссар, салихIсса авлад махъ личIарча, миннал дуаьлул барачат бияйссар, мюрщину буна ливтIуминная Кьиямасса кьини шафааьт бияйссар, къатлул, дукралул, даврил къуллугьру циняв цахунма къабагьайссар.
ХIасил, салихIсса щарсса бакIрайн дагьарча, мунийну тирханну, ххаришиву хъуннассар, диндалул кумаг хъунмассар, муниву мюнпатру чIявуссар. Аллагьнангу ﷻ, Идавсингу ﷺ щар дуцаву хъинну ччиссар. Кулпат гьарза шаврияту нигьа увсун, щарсса дуцаврияту махъунай машарача. Миннан ризкьи Аллагьнаяри ﷻ. Му ялагу Идавсил ﷺ суннат къабувгьумари.
Амма, ва заманнаву ласнайн щарсса мютIий дакъасса, нитти-буттайн авлад мютIий бакъасса пасикьтал, фажиртал (бунагькартал) чIяву хъанахъисса патратсса заманнавурив къадуцавура хъинни тIиссагу бур, аьсивсса уммат гьарза хъанай тIий, Ва заманнул тIабиаьтгу хъинну оьсса дуну тIий. Миннал тIабиаьтрай ссавур давугу, миннал хIукьукьру тIайла буккавугу, миннан ва заманнаву хIалалсса маэшат тIалав бавугу захIматну тIий. Миннал буруккинтту буллалавугу, хажалат ккюхIавугу, Аллагьнал ﷻ эбадатраяту машгъул авугу, чIяруну ми сававрайну цува бунагьралун агьлай тIий. ХIатта МухIаммад идавсил ﷺ увкуну бур: «Ца замана бучIантIиссар инсан цала щарсса-кулпат сававрайну гьалак хъанахъисса. Миннал мунай цайминнал куна касму къадаврий, хъус дакъашиврий аьйру дуллай, муналгу му яхI бивзун занай, захIмат буллай, хъус тIалав дуллай, цувагу цIуцIаву хьуну ивкIуну яла Кьиямасса кьини цалва агьлугу муттаэталну хьунтIисса, жун ххуллурду лахьхьин къабунни, мунал дурмур, дуллумур хIалалссаяв, хIарамссияв къакIула жун, канай, лахлай бивкIру, мунан дула Аллагь ﷻ жунссагу аьзаб, тIий дяъвикартал хьунтIисса». Му замана тти бувкIун бур.
Утти щар дурцуну, луттирал тIисса куццуй му ядангу хъинну захIматри. Му сававну чIявусса бунагьиртталун агьайссар. Щарсса дурцуну ядуван тIакьат дакъасса, ягу мунин цайва ялувсса хIукьукьру тIайла буккан кьудрат дакъасса, къадуцавриву маслихIат ххуй бивзсса адиминаннив къадуцаву хъинссар. Чурххал гьавас багьлай ухьурча зума дугьаврийну гъагъан буванссар. Зума дугьлайгу къагъавгъуну, зунарайн, оьккисса иширайн агьаврияту нигьачIий ухьурча, му чIумал дуцин ялувссар ци чулухатугу. Дуцин, ядуван кьуд-рат дусса унугу цува ца оьзру бусса ухьурчарив, хъунав хьусса уну, я къашавайнасса уну, муналгу дуцаву карагьатри.
