Щейхнал хIурматран

НицIавкIуллал шяравалу дур Гъумучату баргълагавал чулийннай шанна-мукьра километралул манзилданий. 1944-кусса шинал, зунттава бизан бувну нанисса чIумал шяраву бивкIун бур 60-луннийн бивсса къатта-къуш, яхъанайгу ивкIун ур 231 инсан.

Шяравалу сакин хьусса кIанттугу, цурда дурну диркIсса архитектуралул диц-куцгу ялугьлагьинаща ябатIин къашайсса кьяйдалийсса дур. Му асар цукунчIав чIиви личIлай бакъар хIатта щар щалла эяллай дарцIуну мукьахгума.

Ва хъун дакъасса шярава бувккун бур цаннаяр ца цIанихсса, гьунар бюхттулсса инсантал – илданул дянив цIа машгьурсса аьлимтал.

Дунияллул бусурманнаву цIа дурксса, Дагъусттаннал ва щалагу Ухссавнил Къапкъазуллал Муфтий, тарикьатрал шанна къяртлул шайх Сайпуллагь-кьади Башларовлул цIа къакIулсса инсанвагу акъахьунссар. Къапкъазуллал цинявппагу бусурмантурал чулухату увчIуну ивкIссар Аьрасатнал Учредительный Собраниялул членну. Ялув Къазанищуллал шяраву ванал гьаттай бувну буссар зиярат.

МахIачкъалалив ва цаймигу Дагъусттаннал шагьрурдай ва шяраваллаву бур ванал цIа дирзсса мизитру, мадрасартту ва колледжру. ХIакьину жучIава бур щейхнал чивчусса тIарикьатрая, ва медициналия бусласисса луттирду.

Уттигъанну НицIавкIуллал шяраву дайдирхьунни Сайфуллагь-Кьади Башларовлул къатри цIудуккан дуллалисса даву.

Майрал 18-нний къатрал гьану бутIинсса кумагран шяравун бувкIуна личIи-личIисса лакрал щархъавасса мукьцIалаксса инсан.

Щейхнал къатри дакьин даврия балжину жухь бувсунни ва даврил жаваблувшиву дуллалисса диндалул аьлимчу Сиражуттин Кьурбановлул:

«Жу хIакьину бавтIун буру НицIавкIрав – щала дунияллийх цIа дурксса щейх Сайфуллагь-Кьади Башларовлул шяравун. Шикку диркIссар га увсса ва хъуна хьусса къатри. ХIакьину байбивхьуру къатри цIуницIа гьаз дуллай, цIана гьану бутIлай буру. Шиккун цанма чирилун ва барачатран чIявусса жула диндалул уссурвал бувкIунни. Гьану бувтIуну махъ чIиртту гьаз бувантIиссар, хьхьичIава бивкIсса куццуй, гайва чартту ишла бувну. Гьарца чарий буссар номер бивхьуну, цила кIанай бишин хьуншиврул. Къатри цIудуккан даврил сиптачиталну хьунни Сайфуллагь-Кьадинал наслулиясса Башларов ХIусайн ва цаймигу гъан-маччами. Вайнал чIарав бавцIунни Дагъусттаннал Муфтият, имамтал ва гъира бусса агьали. Ва хъанай бур жула бюхттулсса щейхнахасса хIурмат бавричIансса уттигу ца ша» - увкунни С. Кьурбановлул.

Майрал 20-нний НицIавкIрав кумагран бувкIун бия яруссаннал Дылым шяравасса жагьилтал.