Нурдания лявхъуми
Малаиктал – Аллагьнал ﷻ ляличIисса нурдания ляхъан бувсса, аькьлу бусса махлукьатри. Гайннал инсаннал кунмасса чурх бакъассар. Малаиктал бушиву жунма кIул хьуссар Кьуръандалува ва МухIаммад Идавсил ﷺ бувсмунива – хIадисирттава.
Малаиктурал дукия къадукайссар, хIачIия къахIачIайссар, адимина– хъамитайпа куну личIи баву дакъассар, шагьват бакъассар, бунагь къабайссар, даин Аллагьнайн ﷻ эбадат даврихух лавгун буссар, ца лахIзалийссавагу цала эбадатрая гъапул къашайссар, так Заннал цанма амру бувмур биттур буллайри бусса. Малаиктал литIунтIиссар ва Кьиямасса кьини уттава бантIиссар.
Аьрщи ва ссавру малаиктурал дурцIуну дуссар, циксса буссарив так ца Заннан бакъа къакIулссар. Аллагьнал ﷻ кьудратрайну малаиктал инсаннал, хIайвантрал суратирттайн кIура баяйссар. Гьарца малаикнал цанма ккаккан бувсса амру, хIал, кIану буссар.
Цаппара малаиктурал цIарду:
- Жабраил (Джибриль) – Аллагьнал ﷻ Цала идавстурачIан вахIю (илгьам) биян бан гьан увайсса илчи.
- Микаил – дунияллий неъматру (гъарал, марххала, марч ва м.ц.) бачин байсса малаик.
- Израил (Азраиль) – бивкIулул малаик (малакул-мавт) – дунияллия гьан чIун хьуминнал рухI ласайма.
- Исрафил – Ахир-замана бучIайхту ва Кьиямасса кьини дияйхту сурданувун уф учинма.
Вай мукьагу яла хъуними малаикталли.
- Малик – Дужжагьрал каялувчи, гивусса низам дачин дурма.
- Ризван – Алжаннул каялувчи, гивусса малаиктурал бакIчи.
- Мункар ва Накир – гьаттаву инсаннахь суал буллантIисса малаиктал.
- Ракьиб ва Аьтид – хъинсса ва оьккисса аьмаллу чичлачисса, мудан инсаннащалсса малаиктал.
Вай бакъассагу, буссар инсантал буручлачисса малаиктал – хIафаза, Забаният – дужжагьраву аьзав дуллалисса малаиктал, Хазанатул жаннат – Алжаннавусса малаиктал, хIамалатул Аьрш – Аллагьнал ﷻ ляхъан дурмунива яла хъунмур – Аьрш ларсун нанисса малаиктал, кьурубийюн – Аллагьнал ﷻ цIа хъун дуллалисса малаиктал.
