Гьарца пишалул залуннал адавру
Гьарца пишалул залуннал адавру
Аллагь Тааьланахлуну бувайсса аьмаллал ххирашиву, ххуйшиву, мунил чири хъун-чIивишиву инсантурал ахIваллах бурувгунни бикIайсса. Дунияллийсса инсанталгу личIи-личIисса ссинфирдайсса (журардайсса) буссар. Миннан гьариманан цанма-цанма буван лайкъсса, Аллагь ﷻ рязи шайсса аьмаллугу личIи-личIисса буссар. Мукун бухьувкун, гьарманай ялувссар цува цумур ссинфирал инсан урив, цумур аьмалданул агьулданияту урив пикри бувну, цанма лайкьсса, Аллагь ﷻ рязий хьунсса аьмаллал ялув авцIуну, ми буллан.
• Ми инсанталгу ку султIантал, паччахIтал, хантал, хъунимири. Хъуними ялув бакъа чара бакъассар, халкъ куннал ку букантIиссар. Миннал аьмаллава яла ххирамур, Аллагь ﷻ рязий шаймур, буллан ялувмур – инсапрайну халкьуннал дянив аьдлу бачин бавури, миннавун пасатшиву дагьан къаритавури, залимнаяту зулмулувун агьманал хIакь лавсун, тIайла бацIан бавури. Мукунма, бусурмантурал амрурдаву, иширттаву, ахIваллаву ислахIмур, мюнпатмур нани бавури. Вай аьмаллу баврийну акъа Аллагь ﷻ минная рязи къашайссар, цамур ци эбадат дуварчагу, хIатта Аллагьнал ﷻ хьхьичIун агьну цIарал кусавлин сужда булларчагу. Мукун миннал ца къини аьдлу баврил чири хьунмассар арулцIалла шинай дурсса аьбиднал эбадатнияр.
• Кувгу ми султIантурал, халкъуннал ялув бивтсса кьадитал, вазиртал, вакилталли. Миннал аьмаллава хъинмур, ххирамур – халкъуннахь вяъза, насихIат бусавури. Иминшиву давури цахьра ихтияр дусса иширттаву, хиянатшиву къадавури, хъяврин къабавури.
• Кув аьлимталли. Миннал аьмаллава яла ххирамур – дунияллул хъус-хъиншиву, хъуншиву тIалав къадуллай, цала элмулийн бувну аьмал буллай бикIавури.
• Кув тIалибтал, муталимталли. Миннал аьмаллава яла ххирамур – цала дакI элмулухун машгъул давури.
• Кув хъуслил, неъматрал, рахIатшиврул агьлури. Миннал аьмаллава яла ххирамур, неъматрайн щукру бавури, рахIму-цIими бавури, сахаватлушиву дувавури.
• Кув савдажартал, машачиталли. Миннал аьмаллава яла ххирамур – маша-ххашалуву тIайлашиву давури, щялмахъ къабувсун, хиянатшиву къадурну.
• Кув пиша-санятрал агьлури. Миннал аьмаллава яла ххирамур – дайсса давриву хиянатшиву къадурну, марцIну икъралданий давури.
• Кув пакьиртал, мискинталли. Миннал аьмаллава яла ххирамур – мискиншиврий рязишиву дурну, хIараммуния бурувччуну бикIавури.
• Кув аьбидтал, загьидтал, мухлисталли. Миннал аьмалдава яла ххирамур – халкьунная илкинну, вараъ дуну, Аллагь ﷻ ххирану бикIавури.
• Кув балаллал, къашайшивурттал бувгьусса буссар. Миннал аьмаллава яла ххирамур – ссавурданий лазимну бикIавури.
• Кув дукъарккусса, аьвамсса, оьмур-хъинмур къакIулсса буссар. Миннал аьмаллава яла ххирамур – гьарца чIумал къакIулмур кIул буллалавури.
• Кув вирисса, жагьилсса буссар. Миннал аьмаллава яла ххирамур – чIяруну зума дугьлай, чурх гъагъан бувну, мунин ччимур къабавури.
• Кув хъунив хьусса буссар. Миннал аьмаллава яла ххирамур – чакру, эбадат чIяруну давури.
• Кувгу хъамири. Миннал эбадатрава яла ххирамурдив – ласнал маэшатрай рязину бикIавури, кьатIух къазанай ичIува бурувччуну бикIавури, кьацIлин хьхьури дурну, калам чанну бикIавури, лас рязи хьунмур буллалавури.
Му куццуй, гьарцаннал цанма-цанма лайкъсса, Аллагь рязи хьунмур аьмал буллалаву хъинссар.
Инсантурал бувсса ххуйми аьмаллугу – марцIсса, ххуйсса ниятрай, Аллагьнан ﷻ къамул хьунсса куццуй бувмурди. Му бувманал суратрайсса малаиктал хьуну, миннуяту левххун, ссавруннайн лавхъун, Сидратул Мунтагьалий кьарар хьуну бацIайссар.
