Иман цIакь дуваймур
ДакIнивусса иман цIакь даврил ва кьянкьа ларгсса дакIру хъин шаврил дарманну хъанахъиссар ялавай чивчумур:
– диндалул элму лахьхьин дуллалисса, вяъза-насихIат буслалисса, салихIсса инсантурая ва гайннал оьрмурдая ихтилат буллалисса мажлисирттавух гьуртту шаву;
– чIявуну бивкIу дакIнин бутаву, маччасса инсантал кунная ку бивкIулул личIи байшивруя, оьрчIру нитти-буттацIа, нину-ппухълу оьрчIацIа байшиврия пикри буллалаву;
– лахъсса къуллугъ, хъус-хъиншиву циксса чIярусса духьурчагу, Израил-малаик рухI ласун учIайхту, гайннуя мюнпат къабияншиву кIулну, гьаттавун так чурх гьантIишивруя, хъус шийра личIантIишивруя пикрирдай бикIаву;
– бивкIу буччавриву гьуртту шаву, ивкIуманал ахIвал-хIалданул пикри баву: тархъансса дуниялгу кьадиртун, цIансса гьаттавун увххун, махъунай зана икIансса мажал бакъа ушиву, гукуннасса кьини вила бакIрачIангу дучIаншиву дакIний битаву.
Инсан укунсса кIанттурдай гьурту хъанай, цанма чIалачIимур лаласлай, куртIну пикри буллай ухьурча, Аллагьнал ﷻ кьудратрайну ганал дакIниву дахханашивуртту шаврийн умуд бур.
