Яла́ гъи́рат дума – Аллагьри ﷻ
Яла́ гъи́рат дума – Аллагьри ﷻ
Аллагьнал ﷻ гъиратрал лишан вари – Заннал Цува кIул шаврил цамур куц ляхъан къадурссар, так Цалва ххуллу бакъасса.
Ялагу бувсун бур, Аллагьу Тааьланал ца идавснахь увкуну бивкIшиву: «Ца пулансса инсаннал Ттул чулухуннайсса мюхтажшиву духьурча, Ттулгу ганал чулухуннайсса мюхтажшиву дур. Ганал Ттул мюхтажшиву щаллу дуварча, Нагу ганалмур щаллу данна». Га идавснал цIувххуну бур: «Я Рабби, я Аллагь, цукунни Вил щиву-дунугу мюхтажшиву дикIан бюхъайсса, Инава гьарзадрал ялув Кьудрат Дума́ унува?» Аллагьнал ﷻ укунсса жаваб дуллуну дур (мяъна): «Га пуланнал дакIниву На акъара, цамур зад дур. Ганал цала дакI марцI дувача, На ганал мюхтажшиву щаллу дуванна».
Ца салихIсса инсаннал бувсун бур: «На Лубнан тIисса зунтту бусса кIанайх заназисса чIумал ттун хьуна авкьуна бургъил ва мурчал ччуччин увсса жагьил. На хIисав шайхту га ливхъун авчуна, цувалу личIан ччай. На учав: «Ттул уссу, ца-кIива насихIатрал махъвагу уча, балики ттун гайннуя мюнпат хьун!» Микку жагьил ттух кIурагу авну увкуна: «ЛичIлулну бикIи, Аллагьнал ﷻ гъират хъуннассар. Заннан къаччиссар Цала лагънал дакIниву Цува акъа цамур зад дума».
Устаз Абу Аьли ад-Дакъакьлул увкуну бур: «Ца къундалул билаятрай яхъанахъисса аьраб Мадиналивсса Идавсил ﷺ мизитравун увххун, гиву цала чIиви хIажат тIайла бувккун бур. АсхIабтал анавар бувккун бур га инсан мизитрава уккан уван. Идавсил ﷺ увкуну бур: "Танал дучIи дакъасса тIул дурунни". АсхIабтал цIуру-кIуру буллан бивкIун бур, адав дакъасса къел дурсса, нач дакъасса инсан ккавккун. Мува куццуй, Аллагьнал ﷻ хъуншиву кIул хьуманангу захIматссар дакIниву ургъил бакъасса инсаннал буллалисса зикрилух вичIи дишаву. Мукунма захIматссар Заннайн багьайкунсса хIурмат ва иминшиву дакъа́ эбадат дуллалиманайн мютIи шаву.
