Дунияллул неъматирттал кьадаршиву ва миннуя махъун шаврил агьамшиву
КIулну икIу, АллагьначIан ﷻ гъан хьусса лагътуран тIивтIуссар дунияллийсса оьрмулул мяъна, кIул хьуссар дунияллул аски-кьадаршиву. Муниятури салихIинтурал муних къулагъас къадувайсса ва цалла дакIру муницIун дахIин къадитайсса.
Бусала бур, ца чIумал жула сайид Аьли ибн АбутIалиб хIатталливгу увкIун увкуну бур: «Зуйн ссалам, Заннаясса цIими ва барачатшиву, хIатталул агьлу. Зу жухь бусаннув цIусса хаварду ягу жу зухь бусавив?» Микку Аьлин ца чIу бавну бур: «Зуйнгу ссалам, Аллагьнал ﷻ цIими ва барачатшиву. Жу дунияллия лавгун махъ микку хьумур ина буси «. Аьли-асхIаблул бувсун бур: «Зул хъами цайминнан щар хьунни, зул хъус цайминнайх дарчIунни, зул оьрчIру ятинну ливчIунни, зу бувсса къатраву зул душмантал щябивкIунни. ЖучIа укунсса бур хаварду. ЗучIа цукунсса бур?» ЧIунил жаваб дуллуну дур: «Жул сурурду аьвунни, бурчу каса-касакру хьуну ппив хьунни, яру чIаврдайх экьи лавгунни, майрду лалул бувцIунни. Жун шикку лявкъунни так дунияллий дуллай бивкIмур, дунияллий кьадиртмуния махIрумну ливчIунну. Жу дунияллий дуллай бивкIсса тIуллал биялалулу ливчIунну».
Дунияллул хъуслия ссалихIинтурал укунсса махъру увкуну бур:
Фузайл ибн Иязлул увкуну бур: «Кьиямасса кьини хIисав-суал къабувантIишиву кIулну ва щала дуниял ттунна дулун най бивкIссания, му чIумалгу ттун ва дуниял дакIоьзанну дикIанссия, инсаннан щяв дагьсса хIайвандалул кьаркьала дакIоьзанну дикIайсса кунна ва цала янна чапал къахьуншиврул ганил чIарах уккайсса куна».
Ибрагьим ибн Адгьамлухь бувсун бур дикIул багьа ххира хьушиву. «Туну му кьюкьин дувара (машан маласларди)», куну бур Ибрагьимлул.
Му куццуй, суфийтал укунсса хIасилданийн бувкIссар: дунияллул хъуслих ччаврил яру буруган бувма Аллагь Тааьланал илагьийсса нурдануцIа, хIакьсса элмулуцIа ва дакIнил загьидшивруцIа махIрумхьунтIиссар. Абул-хIусайн ал-Хаваринахь цIув-ххуну бивкI-ссар дунияллул неъматирттая загьид шаврия. Ганал увкуссар: «Загьидшиву – дунияллул неъматру аски-кьадарну, кьюкьалану чIалачIавур, амма мува чIумал вила ххаллилшивугу дурурччуну».
