Халкьуннаясса заралунничIа ссавур даврил ххаллилшиву
Муриднал ца агьамсса буржну хъанахъиссар цала диндалул уссурварая ххуйсса пикрилий икIаву. Му бурж биттур къабуллай, щияту-бунугу оьккисса пикрилий ушиву – инсаннал дакI марцIсса дакъашиврул, чапалшиврул лишан хъанахъиссар. МуницIун мурид цала цува ххуй уллай, цала нафсирахлу уклай ухьурча, кIулну бикIияра, Аллагьнан ﷻ къаччиссар му инсан ЦачIанма гъан бувминнавух итан.
Масала, табиинтурай зулмурду буллай бивкIсса чIумал, гайннал зулмукартураха оьккисса дуаьгума къадувайсса диркIссар, цанчирча, гай бивкIссар Аллагь ﷻ кIул шаврил даражалийн бивсса инсантал. Гайннавасса щил-дунугу зулмукартуран оьсса дуаь дуварчагу, дакIнивусса сситтул ягу цалва захIматсса тагьарданул цIаний дувайсса къадиркIссарча, так Аллагьнал ﷻ ихтиярданийнур дувайсса диркIсса.
Аш-Шазалил бувсун бур: «Ца чIумал ттун ччан бивкIуна зулмукарнаха оьккисса дуаь дуван, амма на уссияв щаклий, мукунсса дуаь дуван бучIирвав тIий. Мунияр махъ ттун макIра ккавккуна ттула усттаз, ганал ттухь увкуна: «Зулмукар пана уван анавар мауккара», – куну. Цанчирча, душмантал бух баву ва АллагьначIан ﷻ гъан хьуминнан кумаг баву – кьюлтIсса гьавасну ккаллиссар. Аллагьнал ﷻ чичрулущал бястлий увккун цала нафсирал гьавасрал тIимур буллалима – тIайламану къаикIантIиссар».
Мяълумсса задри, мурид цала нафсирахлу уклай, ганин тIайлабацIу чIа тIий ухьурча, му луххаха лащантIишиву. Цала нафсиран ччимур буллалисса лагъ агьантIиссар рувхIанийсса пасатшиврувун. Цала нафсирая рязи хьумарив – чара бакъа зарал бивману личIантIиссар.
Жула заманнай ттуршила чIяву хьуну бур питнарду дуллалими. Мунил цIаний жяматраву цашиву дакъар. Амма умуд бур зуйнна хIусудшиву дуллалимвнал чулухуннай зу ссавур дуванссар, жаваб къадулунссар, гайннал тIуллах къулагъас къадуванссар тIисса. Мукун буван аьркинссар, гай зулмукартурал инкаршиннардал оьккисса асар Аллагьнан ﷻ ххираминнайн къабияншиврул. Зулмукартал буссар цивппа аькьлу-кIулши дусса инсанталлу тIий, аммарив мяйжаннугу гайннал цащава бувчIин къашаймуний инкар буллалиссар. Цала иман хьхьарашиврул гай бачайссар цанма къакIулмуния бястру буллай. Мукунми къабачайссар Кьуръандалул ккаккан бувсса, Адамлул щалва агьлу-авладрал сайидну хъанахъисса МухIаммад ИдавсийхчIин ﷺ тIайла бувксса, хIакьикьатрал ва мяърипатрал ххуллийх.
Ялув увкумунил мурад – зу Заннайн таваккал бутлай, циняв иширттаву так Аллагьнайн ﷻ умуд бивхьуну ссавурданий бикIавур, цанчирча, так Аллагьри ﷻ жуна аьркинсса. Аллагьри ﷻ дуниял-аьламрал Заллу, яла хъинма Ихтиварлу. Аммарив гьарца Муса идавсин цанасса фиръавн уссар. Аллагьнал ﷻ ПаччахIлугъраву Заннаяр ххув шайсса цучIав акъассар.
