Кьадар – Аллагьная ﷻ
Кьадар – Аллагьная ﷻ
(дайдихьу хьхьичIми номердай)
КIулша, циняв амрурду ва ишру буссар Аллагьнал ﷻ кьудратралу. Инсантал дахьва укунмасса чурхру ва суратрур, ми Аллагьнал ﷻ цанма ччисса куццуй бачин бувну занакьулу бувайссар. Ва иш бакIравун лавсманан цанма зарал бувманайн сси къабизантIиссар, цанчирча мунан кIулссар мяйжаннугу гьарзад ляхъан дурма Аллагьу Тааьла ушиву ва цама акъашиву.
СалихIинтурал хъунама усттаз (кьутIб) Аьбдулвагьгьаб Шяъранил «Аль-минануль кубра» тIисса луттираву чивчуну бур: «Аллагьу Тааьланал ттун ца неъмат буллунни: ттунма зарал бувма тIайла увансса хIучча ххал бувайсса хасият дур ттул. На ганай аьй къадувара, махъунмай зарал къабувара, оьсса жаваб къадулара. Цанчирча, ттун кIулли я мукъуйну я тIулданийну ттун зарал буван щищачIав къахьунтIиссия, Заннал мукунсса чичру дакъассания ва навагу му заралданун лайкьсса бунагь къабувссания. На ургара Аллагьнал ﷻ Кьуд-ратрах ва чичрулух, халкьуннан ччимуних къулагъас къадувара. Гьарца хъанахъимуних вана укун ургайсса инсан тIачIав пашман къахьунтIиссар, цанма зарал бувманайн сси къабизлантIиссар. Аллагьнал ﷻ нясив бувмунийн сси бизлан къашайссар. Оьбала бувманайн къащивагу циван къабикIайссар куну цIуххирча, гьарца зад сукку шавугу, паракьатшивугу так Аллагьнал ﷻ кашилийну душиву кIулнутIийри. Оьшиву дуллалисса инсанталгу мархь кунмассар, цаннал ваманайх бишлашисса. Аькьилсса инсаннал му мархь цийнува цуппа къабищайшиву кIулссар, му канил бувгьуманал бишлашишиву бувчIлачIиссар. Аллагьнал ﷻ чичрулийн манеъшинна дакъашивугу циванни учирча – ми гьарзад нясив бувсса Аллагьнал ﷻ халкьуннайсса ЦIими ниттил цилва оьрчIайсса цIимилуяр хъунмасса бушиву кIулнутIийри».
Шичча мяйжан хъанай бур укунсса зад: зарал бувманайн сси бизан бюхъайссар циняр тIуллу инсантурал дувайшиврий дакI дарцIуманал. Пикри бувара, бунагьравун агьсса, халкьуннал хьхьичI баявур хьусса инсанннал дакI цукун ччучлай дикIанссар, цалва бувмуния пашманну ва къуману?. Аммарив, мунан кIулхьурча цува дунияллийн укканнинма Аллагь Тааьланал му иш цанма нясив бувну бивкIшиву, мунал дакIнивусса хIасрат бигьа хьунтIиссар. Мува куццуй, талихIрайн уккантIиссар кIивагу аьламраву (дунияллий ва ахиратраву) так ца Заллу ушиву кIулма. Мукунсса инсаннал цалва оьрмулуву хъанахъимуния лазан ласлантIиссар. Му лащан буван бучIир Кьиямасса кьинисса Дужжагьирал малаиктурал (забаният) тагьардануха. Ми малаиктурал циняв бунагькартурая пардавру лирккун ашкара бувайхту, щилчIав забаниятрай аьй къадувантIиссар (му Аллагьнал ﷻ амрулийну хьусса иш бушиву чIалай). Мува куццуй, ва дунияллийгу цавагу аьмал щинчIав хъар къабувайссар, так ца Аллагь Тааьланайн бакъа. Малаиктал цайнма бувсса бигар биттур буллай бушиву чIалачIисса кунма, винма зарал бувмагу Аллагьнал ﷻ чичрулийну зузиману чIалан икIайссар салихIсса инсантуран. Мунал къаучинтIиссар пулансса инсаннал зарал бувунни куну, так таклиф1 личIаннин.
- Таклиф – Заннал инсаннай ялув бивхьусса буюрду биттур баву ва къадагъа дирхьумуния арх шаву.
