Хъинбала – балардачIа яхI бавриву
Хъинбала – балардачIа яхI бавриву
Лажинлякъу (мунафикь) – му цIуру-кIуру чIявусса, халкьуннан мюнпат чансса ва чIявуну бясру бувайсса инсанни.
ХьхьичIава заманнай сали-хIинтурал цала хъирив наниминнан васият байсса бивкIссар халкьуннаясса зарал бухIияра яхI бувну, куну. Гайннавасса цаннал увкуну бур цала муталимнахь: «МичIакрал ва аькьрабрал кьацI учайхту яхI булува, цайминнаясса заралгу бухIан хьуншиврул». Ца чIумал ганан ккавккун ур мичIак бивчIан ччиса ца мурид. «Вища цукун шай тIарикьатрал ва АллагьначIан ﷻ гъанминнал ххуллий ацIан хIарачат буллан, вила ссибизаврин ччимур буллай, мичIакрал увкусса кьацI бухIан къахъанай, га бивчIан гьуз тIий унува!» – куну бур щейхнал.
Ца щейхнал увкуну бур: «Муриднал яла ххаллилмур хасият – диндалул уссурвараха хIурмат баву, гайннащалсса арардаву хъинсса тIабиаьт ккаккан даву, арцу ва янна махънин къадишаву».
Шибли тIисса салихIсса инсан азарханалийн агьсса чIумал ганах бурган дуркIун дур ца кьюкьа. «Зу цару?» – цIувххуну бур ганал. «Жу буру ина ххирану, вил ялун биян бувкIсса агьали», – куну бур гайннал. Микку Шибли айивхьуну ур гайннайх чартту бишлай, тайгу ливхъун лавгун бур. Микку Шиблил увкуну бур: «Щялмахъчитал, зун на ххирану ивкIссания, ттуясса зарал ссавур дурну бухIантIиссия».
СалихIинтуравасса цаннал увкуну бур: «Цания-ца дунияллул иширал ялув сси къабивзун яхI бан хъанай бухьурча, чара бакъа мукун булува».
