Ссавур давриясса ххаллилсса махъру
Диндалул аьлимтурая жучIанма бивну бур ссавурданул кьимат ва даража бувчIин буллалисса уздансса махъру.
- Жунайд аль-Багъдадил увкуссар: «Ссавур – бала-апатIирттал ва захIматшивурттал кьурчIишиву духIавур, цукунчIавсса рязи акъашиву къадурну».
- Ибну АьтIаиллагьлул учайсса бивкIун бур: «Ссавур – мусиват ялун бивсса чIумал иминшиву дуруччавур».
- Ялагу увкуну бур: «Ссавур – бала бивукунгу, талихIравугу багьу-бизу баххана къабавур».
- Аль-Хаваслул увкуссар: «Ссавур – Кьуръандалул ва Идавсил ﷺ Сунналул низамру биттур давривусса кьянкьашивур».
- Аьли ибн Абу ТIалиблул увкуссар: «Ссавур – бартмихь бикъащайсса хIайванни».
Ссавурданул журарду
Ссавурданул буссар личIи-личIисса журарду:
- Нафсиращалсса иширттавусса ссавур. Щейх Шазалил увкуссар: «Оьккисса дусная арх хьун ччарча, цал вила нафсирая айихьу. Вила нафсиравусса оьккисса хасиятру духлаган дува. Цайминнаяр вичIан вила нафс (яни инава) гъанссар, хъинбалагу цал гъанминнан баву лайкьссар».
- Бала-мусиват бивукун дувайсса ссавур. Мугу – Аллагьнал ﷻ чичрулийну вила бакIрачIан бувкIмур инкар къабувну кьамул бавур. Аммарив, шикаят-аьрза къабуллай цаманахь вийнма бивсса мусиватрая бусавриву цичIав оьккисса ягу ссавур даврихун бакъавкьусса бакъассар. Оьмар ибн аль-ХатIтIаблул увкуссар: «Ссавур даву ва щукру баву варанттуну бивкIссания, ттун личIишиву къадикIанссия гайннувасса цумуний буртти икIарчагу». Идавсихь ﷺ имандалуя цIувххусса чIумал ганал увкуссар: «Иман – му ссавур ва кIукIлусса хасият душивур».
- Бурж зана битан каши дакъасса буржлувначIансса ссавур. Идавсил ﷺ увкуссар: «Бурж зана битайманал чулухуннай ссавур даву – цалвагу, кулпатралгу хьхьичIух апатIирттал арулцIалва къапу лакьайсса цадакьари».
- Халкьунная биллалисса заралунничIа ссавур даву. Мугу ссавурданул яла агьаммур жура хъанахъиссар. Мунил агьамшиву аьлимтурал кIицI ларгссар ва суфийтурал бувчIин бувссар, АллагьначIансса ﷺ ххуллий мунил хъунмасса кIану бугьлай бунутIий.
«СалихIминнал тIабиаьт» тIисса луттирава
