«Шанма бутIул ца бутIа»
"Шанма бутIул ца бутIа"
Кьуръандалувусса ца яла бюхттулмур сура хъанай бур «Аль-Ихлас» («Кьулгьу»). Ва суралул хIакъираву жучIанма бивну бур тамансса Идавсил ﷺ хIадисру.
Шанма бутIул ца бутIа
Абу Саид аль-Худрил бувсун бур МухIаммад Идавсил ﷺ цалва асхIабтурахь цIувххушиву: «Ца хьхьуну Кьуръандалул шанма бутIул ца бутIа буккин щища хьунссар?» Гайннан му иш захIмат бивзун, цIувххуну бур: «Щища шайссар мукунсса даву дуван?» Идавсил ﷺ увкуссар: «Кьуль гьува Ллагьу ахIад (сура «аль-Ихлас») – мури Кьуръандалул шанма бутIул ца бутIа» (Аль-Бухари, Муслим), АхIмад, Тирмизи).
Алжаннаву къатри
Сагьль бин Муаьз ибн Анаслул цала буттая бавну бувсун бур Идавсил ﷺ увкумур: «Куннил хъирив ку ацIва «Кьулгьу» бувккуманан Аллагьнал ﷻ Алжаннаву къатри (къала) булунтIиссар. Вай махъру бавсса Оьмардул увкуну бур: «Жу хIарачат булланну му сура чIявуну ккалан!» «Зун Аллагьнал ﷻ дулунтIиссар мунияр хъинмур ва хъунмур», – увкуну бур Идавсил ﷺ (АхIмад).
Аллагьнан ﷻ ххирама
Аьишатлуясса хIадисраву бувсун бур ца чIумал Идавсил ﷺ аьрххилийн аьрал гьан бувну, гайннал бакIчину ва имамну ивтун ур гьарца чакливу «Ихлас» сура буккайсса инсан. Аьрххилия зана бивкIукун гайннал Идавсихь ﷺ бувсун бур цала имамнал чIявуну «Кьулгьу» буккайшиву. «ЦIуххияра циван буккара куну!» – буюр бувну бур Идавсил ﷺ. Гай лавгун цIувххуну бур. «Ва суралуву Заннал даражалуя бувсун бур, мунияту ттун ххирар ва ккалан», – увкуну бур имамнал. «Бусияра танахь цувагу Аллагьнан ﷻ ххирасса инсан ушиву!», – увкуну бур Идавсил ﷺ. (Бухари, Муслим)
Алжаннавун буххаврил савав
Кьуба мизитраву имамну ансартуравасса ца инсан ивкIун ур. Ганал чаклил гьарца ракааьтраву «АльхIамрал» хъирив цал «Кьулгьу» яла цайми сурарду буккайсса бивкIун бур. Му иш Идавсихь ﷺ бувсукун, ганал цIувххуну бур: «Ина гьарца ракааьтраву «Кьулгьу» ккалай циван айивхьура?» «Ттун ва сура ххирар!» – увкуну бур имамнал. «Му ххирашиврул ина Алжаннавун увцуссара» – увкуну бур Идавсил ﷺ (аль-Бухари).
Дуаьлун жаваб
МухIаммад Идавсин ﷺ хIисав хьуну ур чакливу укунсса дуаь дуллалисса инсан (мяъна): «Я Аллагь, на Вихь чIа тIий ура «Аль-Ихлас» суралуву чивчумунил ххирашиврухлуну». Микку Идавсил ﷺ увкуну бур: «Валлагьи, ва инсаннал чIа увкунни Аллагьнал ﷻ бюхттулсса цIанийну. Му цIанийну чIа увкумур Заннал дулайссар, дурсса дуаь кьамул дувайссар» (Тирмизи).
Балардая буруччаву
Аьишатлул бувсун бур гьарца кьини гьанттайн чIумал шанан утту ишиннин МухIаммад Идавсил ﷺ цала витIянхъру цачIу дирхьуну, «Аль-Ихлас», «Аль-Фалякь», «Ан-Нас» бувккукун, яла каруннавун уф увкуну, ка дияйсса гьарца базулийх ках учайва, куну (Аль-Бухари).
Мукунма, Аьишатлул бувсун бур: «Кулпатравасса цу-унугу къашай шайхту Идавсил ﷺ ганал ялув буккайва «Аль-Муаьвизат» (Кьуръандалул ахирданийсса шанма сура «Аль-Ихлас», «Аль-Фалякь», «Ан-Нас»). Га цува къашавай хьусса чIумалгу на ганал ялув вай сурарду бувккуну ганал цала каруннах ганал чурххайх ках учайссия, Идавсил ﷺ каруннай барачат гьарзанутIий» (Муслим).
