Идавс ﷺ ххираминнал мажлис
Идавс ﷺ ххираминнал мажлис
ХьхьичIвасса заманнаву камилсса элмукIулшивуртту дусса, тIайлану дин дурчIайсса, хъунисса ва машгьурсса аьлимтурал МухIаммад Идавс ﷺ дунияллийн уккаву хъун баву, мавлуд даву цукунчIавсса щак бакъа хъин чулий ккаккан дурну дур. Мува куццуй цIанасса чIумалгу бусурманнал дувайссар мавлудру.
Мавлудру дуваншиврул цачIун батIайссар бусурман яхъанахъисса кIанттаву ккуранну дурну. Мавлудирттайн бавтIминнал Аллагь ﷻ кIицI лаглай, Идавсия ﷺ буслай, щукру буллай, диндалул ххуллу бугьан хIарачат буллай, хъамаллурайн оьвкуну, цадакьа бувну, дакIурдивусса ИдавсичIансса ﷺ ччаву загьир дурну, циняв мяйжаннугу уссурвал кунма цачIун хьуну Идавс ﷻ ва му увсса кьинигу барзгу хъун бувайссар. Исламрал аввалдания байбивхьуну, хIакьинусса кьининин хьхьичIва-хьхьичI хъунисса аьлимтурал, хъирив цинявппагу бусурманнал Идавсил ﷺ мавлуд хъун давриву дур чIярусса хIикматру, далиллу ва хIуччарду. Миннувасса цаппара кIицI лаганну. Цалчин. Идавс ﷺ ххирану бикIаву ва му дуниялийн уккаврия ххари шаву бусурманная тIалав бувну бур Аллагь Тааьланал. КIилчин.
Идавсил ﷺ цува увсса итни кьинилух къулагъас дувайсса диркIссар. Мунал итни кьини зума дугьайва тIар. Циван дугьара куну цIувххукун, Идавсил ﷺ увкуссар: «Ва кьини на увссара». Ва цIакьсса хIадис къагьассарив, бувчIин ччисса инсаннан. Идавсил ﷺ Аллагьнайн ﷻ щукру байва тIар, цува ляхъан увну тIий, оьрму буллунутIий, рахIматну гьан увнутIий. Бусурманнангу лайкьссар ганал кунма щукру баву. Шамулчин. Мавлуд хъанахъиссар Идавс ﷺ дунияллийн уккаврияту ххаришиву загьир дурну, му ххирашиврул мажлис буван бусурман цачIун батIаву. ХIадисравугу увкуну буссар: «Кьиямасса кьини гьарца инсан икIантIиссар цана ххираманащал». Мукьилчин. Идавс ﷺ авриясса, мунал оьрмулиясса ва идавсшивруясса бусалалул гьарза дувайссар жула элму-кIулши. КъакIулманан кIул шайссар, кIулманан дакIнин бутайссар.
КIулмур чIалачIисса кунма хьхьичI бавцIуну, Идавсихсса ﷺ ччаву гуж шайссар, иман камил шайссар. Ххюлчин. Идавсил ﷺ ссайгъатру булайсса бивкIссар шеърилийну цахара цIа дурсса шаэртуран. Му бакъарив Идавсил ﷺ цува хъун уван ихтияр дулаву. Ряххулчин. Бусурман цачIун хьуну, архIал эбадат даву хъинну даража лавайсса, чири бусса ишри. Цадакьа баврилмур кьимат-даража къакIулссагу цучIав акъахьунссар. Ххирасса уссурвал ва ссурвал. ДакIнихтуну хъун дувара Идавс ﷺ увсса кьини, рабиоьл-Аввал барз ва гьарца Идавсищал ﷺ дархIумур. ИншааЛлагь, умуд бур мукун даву дунияллий ва ахиратлуву ххассалшиврул сававну хьунссар тIисса.
ХIАБИБ АЬЛИЕВ
