Аькьилсса бусаларду

Аллагь Тааьланал Эса Идавсин дуллуну диркIун дур ливтIусса халкь уттава буллансса кьудрат. Амма ганайн цаппара халкь вих къахъанай, ашкара увансса сантру дичлай бивкIун бур. Цаннал увкуну бур: – Ина ура уттигъанну ливтIумий уттава буллай, балики гай ливтIунувагу къабикIан. Ачу хьхьичIава ивкIума сагъ ува! – Цу увантIиссарив бусияра! – увкуну бур Эсал. – НухI Идавсил арс Сам уттава ува! – тIалав бувну бур гайннал. Идавс Самлул гьаттачIан лавгун, чаклил кIира ракааьтгу дуруну, Аллагьнайн ﷻ лаизлай дуаь дуллан ивкIун ур. Заннал ﷺ уттава увну ур НухIлул арс. Гьаттава ивзукун, ганал бакI ва чIири кIяла хьуну бивкIун бур. Халкь махIаттал хьуну бур: – Му ци ишри, зул заманнай инсаннал чIара кIяла къашайссияхха! – тIий. – Гьаттава изу тIий оьвтIисса чIу бавукун, ттун ххива Кьиямасса кьини дуркIсса. Муниясса нигьал ттул чIара кIяла хьунни, – увкуну бур Самлул. – Ина та ивкIуссара? – цIувххуну бур ганахь. – Гьаттаву ттул мукьазарда шин хьунни, амма уттигу бивкIулул кьурчIишиву хъама къадиртунни! («Танбигьул-гъафилин») Абу ОьбайдуллагьлучIан ца инсан увкIун ур арулттуршра фарсахрал (1 фарсах ~ 5,5 км) архсса биялаятрая. «Ттун бавунни Аллагьнал ﷻ вин хъунисса кIулшивуртту дуллуну душиву. Буси ссавруннаяр кIумуния, аьрщараяр гьартамуния, чарияр кьянкьамуния, цIараяр кIиримуния, замгьардануяр бявкъумуния, хьхьирияр буллугъмуния, ятиннаяр заэвманая», – куну миннат бувну бур. Аькьлукарнал увкуну бур: «МарцIсса инсаннай бакъу бишаву ссавруннаяр кIуссар; хIакьмур (тIайламур, мяйжанмур) аьрщараяр гьартассар; иман дакъаманал дакI чарияр кьянкьассар; мяшшиву цIараяр кIириссар; дакIнин ххирасса инсаннащал хьуна акьин ччисса гъира щаллу къашаву замгьардануяр бявкъуссар; чанмуний рязишиву дувайманал дакI хьхьирияр буллугъссар; ашкара хьусса ламмам ятиннаяр заэвссар». («Танбигьул-гъафилин»)