Идавсил ﷺ манакьибру

ХIабиб ﷺ загьир шаврил, мунахь «мархIабан» учаврил гъалгъа

Рабиоьль-Аввал зурул

АцIния кIий учинсса

Итни хьхьу ХIабиб увну

Дуниял чанна хьури.

Чапурсса паччахIтурал

Аьдлу-низам¹ пуч хьури,

Мий щя бикIайсса тахтру

БакIра-къутталий багьри.

МукьцIалла ларзу дусса

Кисра² паччахIнал къала

ХIабибнал гьайбатирал³

Дяния хъя чин буври.

Мюрттайн лавххусса къанчру⁴

Багьну гъавгъун зивзури,

ЦIараха къуллугъ баймий

Мий левщун пашман хьури.

Ниттил ХIабиб уваву

Халкьуннан загьир буван

Кяъбалул цIив Нурданул;

Байрахъ⁵ Заннал бивщури.

ХIабибуллагъ уваннин

Ссавнийн занай бивкIсса жинд

Увну махъ чани-цIуртти

Бишлай мичча арх буври.

Аминатлул лякьлува

АхIмад⁶ кьатIув увккувкун

ЧIявусса аьламатру

Халкьуннан загьир хьури.

Бушралий малаиктал

Му ХIабибначIан бувкIун

Ссавруннайва ливчIминнан

Ккаккан увцуну лавгри.

Арс чIарату аьйкьувкун

Аминат пашман хьури,

Малаиктурал канил

ЦIунгу кьувкьуну увкIри.

ХIабибнал мюъжизатру⁷

Буслай тамам дан къашай,

Ниттия личIий хьувкун

Му ссят суждалийн агьри.

Аллагьнаха цIа дувну

ПасихI маз сукку буври,

Ссавнийн кIисса гьаз бувну

Гъалгьа буллан авчури.

Ци буслай урвав куну

Мунах вичIи дирхьувкун

Аллагьнаха цIа дувну

ТасбихI дуллай лявкъури.

«Дужжагьраяту уммат

Ххассар бува», – увкуну

Баянсса каламрайну

Хъирив мунал чIа кури.

Аьлам халкьуннал сайид

Дунияллийн увккувкун

«МархIабан⁸, МухIаммад», – тIий

Цаняв халкь оьв тIун бивкIри.

ХIабибуллагь хъун увну

«МархIабан», – тIий оьвгу тIий

Тти жува бивзун бацIан

Суннатссар куну бури.

БавцIуну эшкьилийну

Жува мунайн оьв чирча,

Таважжугь⁹ камил бувну

«МархIаба» гьарза барча.

ХIалкьалухгу урувгун

Жухьхьунна жаваб дулун

ХIабиб учIайссари тIий

БавцIусса хIадис бури.

Ххуйсса куццуй, камилну

Жу вихь «МархIаба» учин

ХIабиб, вил замандалий

Жу лявхъуну къабивкIун.

БакI никру щяв дирхьуну

«Ча увкра, ХIабиб», – учин,

Вил камилсса Зат¹⁰ ккавккун

РухIру рахIат къавхьувкун.

Дунъяллий акъанугу

Уттавану уну тIий,

«МархIабан» кьазаъ бувну¹¹

Оьвчинну вихь, я ХIабиб!

МахIаллуль-кьиям ли тархIиби хайриль-анам¹²

МархIабан вихьри, ХIабиб,

Мумкинатирттал аслу¹³,

Дуниял-Ахиратрал

Изну¹⁴ буллусса паччахI.

МархIабан вихьри, Расул¹⁵,

ХIасан, ХIусайннул¹⁶ ттатта,

ХIисаб-суал бувайсса

Кьини жун аьркин шайма.

МархIабан вихьри, ХIабиб,

Загьраъ Багьжатлул¹⁷ бутта,

Цинцил¹⁸ куклу хьу кьини

Жу аманат тIун тIима.

МархIабан вихьри, АхIмад,

ХIикматрал¹⁹ бувцIу хьхьири,

КIюла СиратI²⁰ лахъайний

Жу ххассар хьун бувайма.

Ча увкра ина, Сайид,

Сират²¹ лавайсса султIан,

Ча увкра ина, Ясин²²,

Тадбир²³ камилсса инсан.

Ча увкра вихьри, ТIагьа²⁴,

Жул дакIурдил башарат²⁵,

Расултурал ххирама

Сайид ина уну тIий.

Ча увкра вихьри, Идавс,

Вийнури жун барачат,

Вил ххирашиврухлуну

Жугу ххира бувну тIий.

Му ххирасса ХIабибнайн

Цал салават дутарча

Кьадирсса Заннал жуйнна

АцIийлла дутайссари.

АцIийлла жура дуртун

Идавс рязий уварча

Гьар шайъ²⁶ ляхъан дурманал

Ттуршийлла дутайссари.

Эшкьи-ччаврийну дути

МухIаммадлуйн салават,

ЧIа тIий, тIалабгу бува

Мунаяту шафааьт.

Мавла я салли ва саллим даиман абадан

Аьла ХIабибика хайриль-халкьи куллигьими.

ХIабиб ﷺ ттихъин уваврил, мунал нину-ппу литIаврил кьисса

Ца чансса хIаллай ХIабиб

Ниттил чIурай я уври,

Яла цаппара гьантрай

Сувайбатлул²⁷ я уври.

Тти щихьхьункIуй я уван

Му улун ччан бивкIувкун²⁸

Ттихъин увайсса хъаннил²⁹

ХIабибнайн кьаст къадуври.

Ятин ттихъин аврия

Жунма ци хайр хьуви тIий

ТалихI бакъамий хъами

ХIабибная арх хьури.

Сааьдат³⁰ нясив бувсса

Сяъдуллал ХIалиматлул³¹

Ва жавгьар ттунни куну

ХIабиб увцуну лавгри.

Дуки-хIачIия чанну

Къумасса ХIалиматлун

ХIабиб ттихъин увну махъ

Гьарца зад камил хьури.

ХIалиматлул ккуккулий

Зумрат тIи арс уну тIий

УрчIамур ккукку бакъа

АхIмадлул къаттивхъури.

ХIисаб дувара дустал

ХIабибнал камилшиву,

Ккукку ттихълай унува

Аьдлулул³² тIайлашиву.

Идавсил тIабиаьтру

Цанявра личIийну тIий,

Зуруй цаманияргу

Ца кьини хъуна шайва.

Шамма барз хьуну мукьах

АвцIуну занан ивкIри,

УрчIва барз камил хьувкун

Ххуйну гъалгъа тIун ивкIри.

Аллагьнал Нурдания

АхIмад ляхъан увну тIий

ХIабибнал чурххираву

Нукьсансса³³ зад къавхьури.

Зумратлущал³⁴ хъярчирай

ОьрчIал дянив унува

КIива малаик увкIун

Чурххавату дакI дувкри.

Мусил тIясиравату

Марххалттарах шюршуну,

Нурданул мугьру³⁵ бивщун

МарцI дувну вив дирхьури.

Маккаллал МухIаммадлул

Иш ва куццуй хьунни тIий

ХIалиматлучIан Зумрат

Левчуну аьтIий лавгри.

Алжан вин хIалал шивуй,

Аькьлу камил ХIалимат,

ХIабибнан зарал хьуну

Аьйбиралун къабагьан.

ХIабиб личIий шаврия

ХIасратну яру аьтIий,

«Вила арс ХIабиб ма», – тIий

АминатлучIан лавгри.

ХIабиб лякьлуву хьуну

КIива барз лавгсса чIумал

Мадиналлал аьрщарай

Аьбдуллагь³⁶ накьлу хьури.

Лякьлуву оьрчIгу ливчIун

Гъурбатрай лас ивкIуну,

ЧIавасса оьмрулуву

Цуппагу курчIу хьуну.

Аьбдуллагълуй аьтIисса

Аминатлул чIу бавнал

Гьарца дард бигьа хьуну

Хъинну сабур данссия.

МухIаммадлул мукьра шин

Камилну къуртал хьувкун

Мадиналлал шагьрулийн

Аминатлул кьас дуври.

Аьбдуллагьлул гьав дусса

Иваирайн³⁷ бивувкун

ЦIуцIаву ялун дивну

Аминат накьлу хьури.

Нину-ппугу ливтIуну

МухIаммад ятим хьувкун

ХIурулъэн Аминатлуй

Жиндардил маоь буври.

Идавсил ﷺ манакьибру