Лакрал агьалинал ХIаж – 2024
Жула миллатрал дянив Ислам хъиннура гьаз хъанай, чак-дин дуллалими чIяву хъанай бур, щукру Аллагьнайн ﷻ. Шиная шинайн ХIаж буллалисса лакгу гьарза хъанай бур. Гьашину «Марва-тур» компаниялул сакин дурну дия ХIажлив нанисса лакрал группа. Мунил бакIчинугу ивтун ия ХIаж ва Оьмра баврил иш хъинну кIулсса каялувчи – лакрал райондалул имам МухIаммад Майранов.
Лакрал группалуву бивкIсса хIажитурал бувсунни та мубараксса аьрщарайн бивну цала дакIурдивун бивсса асардая.
МухIаммад Аьбдуллаев:
- На ура Къичурлухиял шяравасса. Ттул мадара шинну ларгуна ХIажлив ачин хIадур хъанай. Ахиргу, гьарзадгу кьадиртун, ачин хIукму бувссия.
Утти тихун ивну махъ хIайп тIий ура ччянива къалагаву. Бавмурнияргу, цайминнал бувсмурнияргу, ляличIисса асаршиннарду дур вила яруннин ккаккайхту. ЦIуллушиву ва каши дусса гьарца бусурманчунан ХIаж баву бур чара бакъасса бурж.
Муса Кутиев:
- На ХьурукIратуссара, яхъанай ура Щурагь. Зий ура медуниверситетраву. Гьашину на ттула оьрмулуву цалчинсса ХIаж бав, Аллагьнал ﷻ кумаграйну. Ттун талихI хьунни ва группалувун агьаву. Жул бакIчи ия Майранов МухIаммад – хъинну за кIулсса, ччимур масала щаллу бан бюхъу бусса, элму дурккусса инсан. Группалуву чIявуми лак бия. На вайннава оьрмулул яла хъуниминнавасса ца ухьунссияв. Ттуяр хъунасса так ца инсан ия. Шикку цаннащал ца кIул хьуру, дусшиву хьунни. Гьаксса ххуйну лавгунни жул ХIаж, Аллагьнал ﷻ кьамул баннав! Хъинну ххарира жула вайксса лакрал чиваркI ХIаж бан гьашину бувкIсса.
Аьли ХIусманов:
– Шикку гьарцаманал дурсса дуаь-эбадатру, ХIаж-Оьмра Аллагьнал ﷻ кьамул баннав! Каши дакъаминнай каши хьусса кьини дацIаннав! Дуниял паракьат хьуннав, оьтту экьибутIаву дацIаннав! Жуятува Аллагь ﷻ рязи хьуннав, ахиратраву Алжаннаву циняв бусурман цачIун баннав!
ХIусман Айданов:
– На ЦIуссалакрал шяравасса ура. Гьашину кIилчинна ХIаж буллалисса, цалчин лавгссияв 2013-ку шинал.
Гьашину лакрал личIисса группа бувну бия, нагу вайннавух агьунна. Машааллагь, хъинну ххуйсса группа бия. Аллагьнайн ﷻ щукру гьашину ХIаж бан нясивну лякъаврийн.
Аьлидибир НурмухIаммадов:
– На ГумбетIуллал райондалияссара, ХIажлив кIилчин увкIра. Нава лаккучу акъанугу, Майранов МухIаммадлул группалувун увтунна. Хъинну цачIунсса, тяхъасса группа бия, на рязину ливчIунна.
Синият Мусаева:
– На бура Щаратусса. Аллагьнайн ﷻ щукру, лавгун ХIажгу бувну тиха махъунмай бувкIра, аьтIий макь рутIлайнма Макка ва Мадинагу кьабивтун.
Дагъусттаннай цалчинсса дин жучIара дуссия, халлилну дачингу дурну най бивкIссару. Жула чIявусса щейхтал, аьлимтал буссия, щейх Жамалуттиннуяту тIайла хьуну. Мунияту хъунмасса миннатри лакрал жяматрахь: бачияра ххаллилну ХIажругу, Оьмрардугу булланну, диндалул ххуллу бугьанну.
Асият Кьурбанова:
– Жу щалва кулпат архIал лавгру Аллагьнал ﷻ къатлучIан та мубараксса аьрщарайн, ялун-тулунчIилгу гьан кабакьиннав, кьуват булуннав! Жул группалул хъунама Майранов МухIаммадлунгу цIуллушиву дулуннав, хъинну ххуйну каялувшиву дурунни, укунсса руководитель цалчинни бакIрайн агьсса.
Валибаг:
– На Дарбантлияссара. Нагу агьунна лакрал группалувун. Кьуния цава гьантлий лакрал дянив уссияв. Барчаллагь тIиссара жул ХIаж баврил сакиншинна дурсса «Марва-тур» компаниялухь, хъинну ххуйсса кьяйдалий тихун биянгу бувну, хьунагу бавкьуну, дайсса аьдат-эбадатругу дан кумаг баврих. На хъинну рязину ливчIунна.
Магьликаят Кьурбанова:
– На дурххуссия Сулайман Керимовлул дуллусса путевка. Тай мубараксса кIанттурдайн бивукун ттун дахьва бувчIунни бусурмансса инсаннал талихI мяйжаннугу ссаву буссарив.
ХIаж бигьану лавгунни, Аллагьнал ﷻ кумаграйну личIисса захIматшиву къархьунни. Ва дунияллийсса гьарца инсаннан чIа тIий бура ХIажлив гьансса каши. Бюхълай бухьурча ссахчIав къабурувгун наси. Аллагьнал ﷻ цIими гьарзассар, кумаг бантIиссар.
Жул группалул хъунаману ивкIсса Баталов ХIабиблун хъунмасса барчаллагь жухь гьарца шаттирах буван аьркинмур буслай, кумаг буллай ия.
Камалуттин Сулайманов:
– Жу ХIажлив бувкIру хъунмасса кулпатращал. Жулва циняв лакран чIа тIий ура ва аьрщарайн биянсса каши ва кьудрат. Сант, цIуллушиву думанан чара бакъа махъун къабувтун шиккун бучIан, ХIаж ва Оьмра буван аьркинни.
Мухтар МухIаммадов:
– Циняв щаллу дан аьркинсса эбадатру, рукнурдугу дуварду, зияратирттайнгу бивру. Каши дусса гьарца инсаннайн оьвчаву дуллай ура ХIажлив бучIан ялунчIин лакрал группалущал.
Аьбдулаьзиз Алхасов:
– Жул буссия хъунмасса группа – на, ттул ссурвал, щарсса, щарни-уссурвал. Аллагьнайн ﷻ щукру, жу ХIаж буварду щаллуну. Ттиния тихунмайгу гьансса ният дур, Заннал нясив барча. ЦIуллушиву дулуннав!
ХIабиб Баталов, Гъази-Гъумучиял имамнал хъиривчу, ХIажлив ца группалул хъунама:
– АльхIамдулиллагь, хъинну ххуйну лавгунни ХIаж, аьй дансса кIану бакъая. ЛяличIисса барчаллагь тIиссара «Марва-Тур» компаниялул зузалтрахь. Тайннал хъинну хъунмасса хIарачат бувну бия группардал каялувчитурал даву бигьа хьуншиврул.
Тукунсса кIанттурдаву инсан мяйжаннугу цукунсса уссарив кIул шай, хьхьичIва-хьхьичIгу вина инава цу уссарав кIул шара.
Ттуйн тапшур бувсса хIажитал хъинну ххалилсса, инсаншиву дусса бия. Та ХIажлив яла ххуймур группа жул бия учин хьунссар. Ци иширавун багьарчагу цIуру-кIуру къабуллай, ссавур дувайва. Цинявннан барчаллагь!
Арсен Мусаев:
– Ттун тийх гьарзад ххуй дирзунни. Ттула мяйжансса ватандалийн ивсса куна хьура.
Салим Аьлибуттаев:
– Барчаллагь тIиссара щалвагу группалухь ва хъуниминнахь. Шикку буссаксса мутталий уссурвал ва ссурвал кунма буссияв. Цинявннан тIайлабацIу баннав!
Арсен Мустапаев:
- На даргиричу ура, ттул кулпат бур лакку инсан. Жун пикри хьуна лакралмур группалущал хIала бувххун ХIаж буван. Му хIукмулия жу пашман къавхьуру.
Римма Исмяилова:
- Хъинну ххарира ттунма та неъмат ккаккан нясивну лякъаврия. Я Аллагь, жула лакрал миллатрайн, щалагу Дагъусттаннайн барачатшиву дияннав, цIуллушиву дулуннав, тIайлабацIу баннав, дунияллий паракьатшиву хьуннав. Цума-цаннахьхьунгу каши дулуннав ХIаж-Оьмра бан!
Муслим АхIмаев:
– Гьашину нагу лакращал ХIажлив уссияв. Так ххуйсса бакъа асарду къаливчIунни, хъинну рязиссара, гьарца зад лахъсса даражалий лавгунни. Вай бия ттул оьрмулуву яла дакIний личIансса гьантри. Барчаллагь «Марва-турданун» ва циняв чIарав бавцIуминнан!
ХIадур бувссар
Арсланаьли Сулаймановлул
