ЩяйтIан арх бувайсса аятру
Зун кIуллив Кьуръандалуву бушиву ляличIисса даража бусса кIива аят? Миннул кьиматрая бувсун бур тамансса хIадисирттаву. Мигу лахъимур «Аль-Бакьара» суралул махъва-махъсса аятрури.
Сунналийн бувну, вай аятру буккайссар хьхьувай утту бишиннин, щяйтIаннул макрурдая, оьбалардая буруччиншиврул.
Ибну Масъоьдлул бувсун бур МухIаммад Идавсил ﷺ махъру: «Хьхьувай утту бишиннин «аль-Бакьара» суралул ахирданийсса кIива аят буккайманан ми гьассар» (аль-Бухари, Муслим). Ва хIадисравусса «ми гьассар» тIисса махъру аьлимтурал укун бувчIин бувну бур: вай аятру бувккума урувччуну икIантIиссар цимурца заралмуния, бала-апатIрая, мусиватрая, мунал дакIнивун паракьатшиву духхантIиссар.
Ялагу аьлимтурал увкуну бур, вай кIива аят буккаврил чири буссар щала хьхьу эбадатрай гьан дурманануксса.
Нуъман ибн Баширдуясса хIадисраву бувсун бур: «МухIаммад Идавсил ﷺ увкуна: "Аллагьнал Кьуръан чивчуссар ссавру ва аьрщи ляхъан дуван кIиазарда шинал хьхьичI. Заннал Луттиравасса «аль-Бакьара» суралул махъсса кIива аят куннил хъирив ку шанма гьантлий буккайсса къатлучIан щяйтIан гъан къахьунтIиссар».
Гай аятру жунма «Амана Расулу» тIисса цIанилу кIулли.
