Аькьилсса бусаларду
Аькьилсса бусаларду
Щукру
Авадансса инсаннан цала эмаратсса къатрал чIавахьулттува ккавккун ур мискинсса, духсса янна лархсса пакьир.
– Щукру Аллагьнайн ﷻ, нава тукун мискинну акъасса! - куну бур аваданчунал.
Га мискинсса адиминан хIисав хьуну ур вев-шев тIий, цащала цува гъалгъа тIисса бакIрава увксса инсан.
– Щукру Аллагьнайн ﷻ, нава дюълилсса ушиву! – куну бур ганал.
БакIрал аххана хьуманан ккавккун бур анавар кумаграл машиналуву захIматну къашавайсса инсан ихьлай.
– Щукру Аллагьнайн ﷻ, ттул чурххахьхьун цIуллушиву дуллусса! - увкуну бур ганал.
Къашайшалан азарханалий ккарккун дур ялун кIяласса янна дуртсса жаназа.
– Щукру Аллагьнайн ﷻ, нава уттавану усса! - увкуну бур къашавайманал.
Мискинманан кIулссар хъус-аваданшиврул кьимат.
Къашавайманан кIулссар цIуллушиврул кьимат.
Дуснакь увманан кIулссар тархъаншиврул кьимат.
ИвкIуманан кIулссар оьрмулул кьимат.
ЩяйтIан хъяврин бувма
Ца инсаннан Иблис хьунабавкьуну, ганихь цIувххуну бур:
– Да Иблис, ттун ччай бур виха лащан, ина кунма оьрму бутлан. Буси, цири бан аьркинсса?
Мукунсса суалдания щяйтIан махIаттал хьуну бур:
– Ина ци тIиссара! БакIрал аххана хьуну урав? Мукунсса миннат ттухь тачIав щилчIав къабувссар.
Амма га инсан махъунай къавхьуну, гьайгьайгу-дайдайгу тIий, лахIан уван къахъанай, цанма кIул бан ччимур кьянкьану тIалав буллан ивкIун ур. Иблисгу рязи хьуну бур ганахь цила кьюлтIмур бусан.
– Ттуха лащан ччарча, ина чак, зума, цайми эбадатру кьадити, щялмахъру гьарза бува, инава тIайланугу къатIайланугу хъарду буллалу, нитти-буттал увкумур мабував.
– Валлагьи, – увкуну бур инсаннал, - на тачIав цавагу чакгу кьакъабитанна, щялмахъгу къабусанна, нитти-буттахгу вичIи дишинна!
– Вагь, на хъяврин бувансса инсан ттинин къавхьуссар, ина цалчинмара! – пашман хьуну бур щяйтIан.
