Зикрилул ххирашиву
Зикрилул ххирашиву
Кьуръан буккаврил хъирив, мазрал дувайсса эбадаттIааьтирттаву, Аллагь ﷻ кIицI лагавунияр ххирасса эбадат дакъассар. Гьарца цамур эбадат Аллагь ﷻ кIицI лагаврин василар (муничIансса ххуллурду), Зал кIицI лаганшиврул дувайсса задрур. Цинявннал мурадгу, матIлабул-аълягу, макьсаду-л-акьсагу (хьхьичIунсса мурад) Аллагь ﷻ кIицI лагавур. Цайми тIааьтирттан, эбадатирттан цанна-цанна чIунну, ккал-кьадарду дуссар. Аллагь ﷻ кIицI лагаврин личIи дурсса чIун дакъассар, гьарца чIумал кIицI лагаву хъинссар, ца кьадаргу бакъассар, циксса кIицI лагарчагу. ЧIявуну кIицI лагияра куну Аллагьнал ﷻ амру бувссар.
Аллагьнал ﷻ ххуллий тур ришлашавунияр, зикри баву ххирассар, арцу-мусил цадакьа бавунияр ххирассар. Му бунагьирттан закъумри, нифакьрая (лажинлякъушивруя) марцI буваймурди, щяйтIаннуя буруччаймурди, цIарая ххассал буваймурди, Имандалул элмури, АллагьначIан ﷻ ияврил дайдихьури, Аллагь ﷻ рязи уваймурди, тIааьтрайн гъира бутаймурди, дакI кIукIлу дуваймурди, аьсившивурттаяту (Заннайн мютIи акъашивруя) айщун уваймурди.
ХIасил, щяйтIаннул увкуссар Аллагь Тааьланахь: «Вил Хъуншиврий хъа буллалиссара, халкь бяйкьин буллай паракьат къахьунна, миннал чурххардиву рухIру дуссаксса ми чапур буллай, аьсив буллай», - куну. Аллагь Тааьланалгу увкуссар: «Я мялоьн, Нагу яла къагьанна миннал аьфву буллай (багъишла битлай), миннал Нава кIицI лаглай даинссаксса», - куну. «На миннал цалану кIицI лагарча, На ми малаиктуврал дянив кIицI лаганна, На миннал лухччиний кIицI лагарча, На ми ссавруннай кIицI лаганна, миннал Ттухава къулугъ буллай кIицI лагарча, на ми неъматрайну кIицI лаганна, миннал на щукрулийну кIицI лагарча, На ми зиядалийну кIицI лаганна», - куну. Аллагь ﷻ кIицI лагавугу кIира кIуццуйсса дуссар: мазрал кIицI лагаву ва дакIнил кIицI лагаву. Мазрал кIицI лавгун зикри баву Расулуллагьнаяту ﷺ Аьлил лавсъссар, дакIнил баву – Абубакардул ﷻ лавсъссар.
Мазрал зикри хIасанатрури, дакIнил зикри – кьурубатру, даражатрури. Зикрилул мурад – дакIнил бавур, маз – муничIансса ххуллур. Мазрал марцIну баврил барачат дакIнингу бияйссар. Мазрал зикри баву тIурча, Аллагь ﷻ дакIний увгьуну, Аллагьнал ﷻ цIардаятусса цIа кIицI лагавури, ци мазрай кIицI лагарчагу, цукун кIицI лагарчагу. Аллагь ﷻ дакIний акъанува кIицI лагавриллив хайр бакъассар, му – дакIниву кьасават думанал пишари. ДакIнил кIицI лагаву – маз сукку къабувнува, дакIниву Аллагь ﷻ увгьуну пикрилий ацIавури. ХIакьикьатрайну мукун ацIарча, мунал даража хъунмассар. Мунал чурххал гьарца базугу Аллагь ﷻ кIицI лаглай бикIайссар. Ялагу, му Аллагь ﷻ кIицI лагаву ччарча кьюлтIну, лагьну дуванссар, ччарчагу бюхттулсса чIуний, оьвкуну, лахъну дуванссар, кIиннилвагу даража буссар.
Амма мунил ххирашиву дикIайссагу кIицI лагайманал хIалданух урувгунни. Оьвкуну кIицI лагавриву рияъ-сумаьт (ккаккиялун дуллалаву) бакъахьурча, оьвкуну ххирассар, дакIнил кьасават яла лагайссар, гъира цIакь шайссар, шану къабиллай дакI тирх тIий дикIайссар, бавминнангу, вичIи дирхьуминнангу чиригу хIасул шайссар. Рияъ хIала хъанай бухьурчарив, ягу цайми эбадат дуллалисса буну, микку миннан шугълурду багьлай буну, зарал хъанай бухьурча, лагьну, кьюлтIну, цайминнан къабаянну кIицI лагланссар, му чIумал мукун кIицI лагаврил даража хъунмассар.
«НасихIатуль аьвам»
