Барча хьуннав байран!
Барча хьуннав байран!
Дагъусттаннал Муфтий щейх АхIмад-афандинал барча бавуртту
Ассаламу аьлайкум ва рахIматуллагьи ва баракатугь, ххирасса уссурвал ва ссурвал!
ДакIнихтуну зу циняв барча буллай ура циняв бусурманнал агьаммур шадлугъ – Кьурбан-байран дучIаврищал!
Ва байран хъанахъиссар ХIаж щаллу баврил лишан. Ванил хъанахъиссар Аллагьнайн ﷻ эбадатраву ляличIисса хIарачат бан, Заннайн хъиннува щукру бан буллусса мажал. Хъуннасса къулагъас дуван аьркинссар вай мубараксса гьантрай миски-гъаривнай, мюхтажминнай аякьа даврих ва гайннал дакIру ххари даврих.
Аллагьу Тааьланал жуйнна оьвчаву дурну, увкуну бур (мяъна): «Зуяту Аллагь рязи къахьунтIиссар, хъинбалардал ххуллий зунна ххирасса хъус харж къадулларча. Циксса харж дуварчагу, Заннан кIулссар» («Али Эмран» суралул 92-мур аят). Муниятур жулва чIаравминнай аякьа даву хъинну агьамсса.
Жулва билаятрая азарахъул инсантал лавгунни мубараксса Макка-Мадиналул аьрщарайн, диндалул ца агьамсса тIалавшинна биттур дуван. Му неъматрахгу дазу-зума дакъасса щукру Аллагьнайн ﷻ. Заннал кьамул баннав хIажитурал дурсса эбадатру, гьарцаманал бувсса Кьурбанну ва дуаьрду.
Кьурбандалул кьинирдай щалва дунияллий шайссар миски-гъаривнан, мушакъатминнан, ятинтуран ка-кумаграл акциярду. Гьарца бувсса хъинбалалух Аллагьу Тааьланал чири булуннав, хъиннува дакI цIий, халкьуннан мюнпатсса давуртту дуллансса каши-кьудрат дулуннав!
ЧIа тIий ура Заннахь дунияллий дакьаву шаву, жулва жямат бала-апатIирттая буруччаву. Аллагьнал ﷻ жула бунагьру багъишла битаннав, талихI булуннав, барачат бишаннав!
