ОьрчIансса ихIсандалул акция

Ккуллал райондалий хьунни «ОьрчIру – жула бучIантIимурди» тIисса ихIсандалул акция. Ванил сиптачитал ва сакиншинначитал хьунни Ккуллал райондалийсса «Инсан» фонд, «Вирттал» цIанилусса ккуран ва диндалул кIулшивуртту дулаврил отделданул вакилтал.

Сайки 30 оьрчIан тIивтIуну бия личIи-личIисса дукрардащалсса авадансса ссупра. Райондалул диндалул кIулшивуртту дулаврил отделданул зузалтрал хIадур дурну дия МухIаммад Идавсил ﷺ оьрмулиясса ва Исламрал тарихраясса оьрчIал кIулшивуртту ххал дуллалисса викторина.

Отделданул хъунама МухIаммад Сулаймановлул бувсунни мероприятиялул мурадрая.

– Ккуллал махIлалий 2-3 зуруй цал дувайссар укунсса мероприятияртту, оьрчIру куннащал кув кIул баву, дусшиву даву, мукунма миннахь Исламрая, имандалия бусаву, мяърипат дуну тарбия шаву мурадрай.

ОьрчIал чялишсса гьурттушиврийну ва тяхъа-таза буккаврийну чIалай бия ва кьини вайннан мяйжаннугусса байран хьушиву. Хъиннува ххари бувна оьрчIру мероприятиялул сакиншинначитурал хIадур дурсса бахшиширттал.

КIицI лаган, «Инсан» фондрал Ккуллал райондалийсса каялувчи Салман Рамазановлул, фондрал вакилтал Рената ХIайдаровал ва Фиалка Оьмаровал хIарачат бувну бия мероприятие лавайсса даражалий сакин дуван.