ЦIусса хаварду
Къутандалий – диндалул мажлис
Ва ххуллухсса аьлимтурал мажлис хьунни Бабаюртуллал райондалийсса турзин тiисса шяраву. Ванийн львовский-3 къутангу учай. Мажлисрай гьуртту хьунни лакрал, цiуссалакрал ва Бабаюртуллал районнайсса имамтал: Мухiаммад ссаламов, Мансур Хаваев, Махiаммадрасул Махiаммадов ва Сайфуллагь-Кьади Башларовлул цiанийсса Махiачкъалаливсса мизитрал имам Мухiаммадрасул Махiадов.
Имамтурал исламрал диндалул ххуллу-хха бурувччуну къуццу тIун аьркиншиврия, жагьилтурал ва оьрчIал диндалул кIулшивуртту цIакьгу, куртIгу дуллан аьркиншивриясса ихтилатру бувуна. Гьуртту хьуна тамансса мюрщи оьрчIругу. Имамтурал мажлисрай гьуртту хьуминнан ссайгъатру, бахшишругу дуллуна. Шяраваллил активистуран дуллуна ХIурматрал грамотартту.
Имамтурал, жулва миллатрал вакилтурал, динчитурал лакрал царагу шяравалу лях гьан къаритан, цинявннах къулагъас дуван хIарачат бувай, чIун-чIумуй аьлимтурал мажлисру, агьалинащалсса хьунабакьавуртту шагьрурдайгу, шяраваллавугу шай. Къутандалий хьусса ва мажлисрал барачатгу щалвагу жяматрайнгу, миллатрайнгу бияннав, укун цачIун батIавриву, ккуркки лагавриву диялсса ххуйшивуртту ва хъиншивуртту дуссар, хайрмюнпатсса ихтилатру хьунни, агьали рязийну ливчIунни.
Мизит бакьин буван багьлай бур
Жунма кIулсса куццуй, РутIуллал райондалий дуссар кIира лакрал шяравалу: Ялув ЧIатIлухъи ва Дюкъул. Вай хъанай дур Самур неххал даралувусса яла хьхьичIраминнувасса щархъурду. Дюкъуллал шяраву имамшиву дуллай ур уздансса лаккучу, шаэр, муаьлим ва тарихчи ХIадис ХIадисов.
Уттигъанну ХIадис Исрапиловичлул баян бувунни шяраваллил мизит мугьлат бакъа бакьин буван багьлай бушиву. Мизитрал магъи экьи най ва ца чулухсса чIира лекьавай бусса бур.
Му куццуйсса нигьачIин дусса тагьарданий бур хIакьинусса кьини Дюкъуллал шяравусса Аллагьнал ﷻ къатта.
Мунин бувну баян бувну бур Дюкъуллал мизитраву давуртту дуван арцу цачIун дуллай бушиву. Балжину цIуххаву дуван ва арцу дичин бюхъантIиссар ва номерданийхчIин: 7 928 555-08-32.
ЦIусса миналий – цIусса мизит
Новостройрайсса ЦIуссалакрал райондалийсса Гьамиящиял шяраву буллай бур мизит. Ва щаллу буваншиврул аьркин хъанай бур личIи-личIисса ка-кумаг.
Шяраваллил имам ГьитIинмухIаммад МухIаммадовлул дурунни Гьамиящиял жяматрал чулухасса оьвчаву, баян бувунни арцу цачIун дуллай байбивхьушиву. «Мизитран бувсса цадакьалул чири хIисав дакъа хъунмасса бикIайссар. Бачияра жувагу мукунсса сант чIарах дуккан къадиртун, шайманал шайсса кумаг буваннуча!», - тIий ур имам.
Балжину цIуххаву дуван бюхъантIиссар телефондалувух оьвкуну: 8-928-559-69-27. Ва номердануцIун дарзуну дуссар арцу дичинсса картагу.
Барча Кьурбан-байран!
Дагъусттаннал Муфтий Щейх Ахiмад-афандинал чулухасса барча бавуртту
Ас-саламу аьлайкум ва рахIматуллагьи ва баракатугь, ххирасса уссурвал ва ссурвал, зуй Заннал цIими бишиннав, барачат гьарза хьуннав!
Барча буллай ура зу циняв бусурманнал яла хъуннамур шадлугъну ккаллисса Кьурбан-байрандалущал. Ва байрандалийнур къуртал шайсса мубараксса аьрщарайсса ХIажрал аьдатругу. Макрузансса азарданул цIаний махъсса шиннардий буван сант къадиркIсса ХIаж буван гьашину чIявусса инсантураща хьунни, Аллагьнайн ﷻ щукру. Гукунсса бала-мусиват тикрал шаврия Заннал жува буруччиннав! Макка-Мадиналул билаятрайн гьан нясивну лявкъуминнал бувмур кьамул хьуннав!
Барачатсса Кьурбан-байрандалул гьантрай жула инсантурал чIявусса цадакьартту бувну миски-гъаривми, ятинтал, мушакъатми ххари бувай. Миннал буллалимургу АллагьначIа ﷻ кьамулну лякъиннав, мукьахгу буллансса каши-кьудрат чIяру даннав!
Заннал ﷻ жула дуаьрду кьамул даннав, дакIру марцI дукканнав. Цинявннан чIа тIий ура цIуллушиву, талихI, барачат ва дакьаву. Барча хьуннав Кьурбан-байран!
Ххирасса бусурмантал! «Ас-салам» кказитрал редакциялул зузалтрал чулуха дакiнихтуну барча хьуннав тiий буру бусурманнал шадлугъ Кьурбан-Байран – Ид аль-Адхiа!
Гьарца шинал дунияллул бусурмантал ялугьлай бикIайссар ва бюхттулсса байрандалул гьантри бучIаннин. Ва байрандалул жунма ккаккан буллалиссар чIаравминнал чулинмай цIими буну, чумартну, сахаватну бикIан аьркиншиву.
Вай барачатсса гьантрай бусурманнал аякьалувун ласайссар цала гъан-маччами, захIматшивурттавун багьми, миски-гъаривтал, ятинтал.
Ххирасса уссурвал ва ссурвал! ЧIа тIий буру зун цIакьсса цIуллушиву, бунагьирттая марцI шаву, хъинбаларду буллансса тавпикь ва тIайлабацIуртту.
Аллагьнал ﷻ кьамул буваннав жула кьурбанну, дургьусса зумарду, жула ужагъирттайн барачатшиву, рахIатшиву, ххаришиву дияннав, гьарца бусурманчувнал дакI имандалул дуцIиннав.
