ЦIуссалакрал райондалул делегация – МуфтийначIа
Июнь зурул 1-нний ЦIуссалакрал райондалул делегация бивунни Дагъусттаннал муфтий, шейх АхIмадафандиначIан. Ва делегациялуву бия Республикалул парламентрал депутат Амирхан Амирханов, ЦIуссалакрал райондалул Имамтурал советрал председатель Шамил Назиров, ЦIуминалийсса имам Мансур Хаваев, райондалул ва шяраваллал бакIчитал, динчитал, спортсментал, жагьилтурал ккураннал вакилтал.
Амирхан Амирхановлул бувсунни делегациялул хъунмур мурад – агьали исламрал ххуллуххуттай цIакьну бацIаврил ялув, рувхIанийсса ххазинарду хьхьичIунну жагьилтал тарбия баврил ялув биялсса захIмат буллалисса республикалул Муфтийнахь барчаллагь учаву бушиву. Муфтийналгу кIицI ларгунни лакрал миллатрал диндалул ххуллийсса цашивру.
– На дакI дарцIуну ура Сайпуллагь-Кьадинал ва Гъази-Гъумучиял щайх Жамалуттиннул барачат ялун биянтIишиврий. Жува жущава шаймургу булланну му барачат лайкь буваврил ххуллий, – увкунни мунал. ЦIуссалакрал администрациялул зузалтрал бувсунни райондалийсса динчитуращалсса даврия, лахъсса кьимат бивщунни имамтурал дуллалисса даврин.
– Райондалий 23 мизит бур, гьарца мизитрацIун Муфтиятрал цIакь бувсса имамталгу бур. Миннащал хIала-гьурттуну, пикригу ца бувну, зий буру, кувннан кув къабувчIлачIисса кIанттурду къашай, – увкунни Айдиевлул. Ванал барчаллагь увкунни «Инсан» тIисса фондрал коронавирусрал ппурттуву райондалун бувсса ка-кумаграхлугу. Муфтийнащалсса хьунабакьаву аьчухсса журалий хьунни. Райондалул делегация бивунни МахIачкъалалив цIуну буллалисса РувхIанийсса центрданийнгу.
Ас-Салам» кказитрал мажлис
Вай гьантрай ЦIуссалакрал райондалул Культуралул къатраву хьунни «Ас-Салам» кказитран хас бувсса мажлис. КIицI лавгсса мажлис хьунни «Инсан» фондрал ва «АсСалам» диндалул рувхIанийсса кIулшивуртту дулаврил кказитрал редакциялул сипталийну.
Шикку гьуртту хьунни ЦIуссалакрал райондалул администрациялул зузалт, Хасавюртуллал райондалул имам Шамил ХIусманов, ЦIуссалакрал райондалул имамтурал советрал хъунама Шамил Назиров, шяраваллал администрациярттал вакилтал ва цаймигу. БатIаврил агьаммур мурад бия «Ас-Салам» кказитрал ва Дагъусттаннал Муфтиятрал вакилтурал рувхIанийсса, ас-намусрайсса тарбия дулаву ва исламрал кIулшивуртту аьч даву мурадрай дуллалисса давурттая бусаву. Мажлисрай ихтилатру бунни цинявппагу хъамаллурал. Цала ихтилатраву Шамил ХIусмановлул кIицI лавгунни рувхIанийсса кIулшивуртту дулайсса кказитирттава «Ас-Салам» диндалул кIулшивурттая цимурца бусайсса, справочник кунмасса, яла хъинмур ва барачатмур бушиву.
– Диндалул хIакъиравусса суаллаву мудангу чIявусса бувчIукъабувчIурду шай. Ттул пикрилий, «Ас-Салам» кказитрай ми суаллансса жавабругу ччянияцIа диндалухун багьсса инсантурангу, дахьва байбивхьуминнангу дурчIинсса куццуйсса дикIай,– увкунни ванал. Ихтилатирттал лях-карах мажлисрай ккалай бия Кьуръандалувасса цаппара аятру. Мукунна асар хьунсса нашидру увкунни ХIусман АьбдурахIмановлул. Мюрщултрал Мутаева Дианал ва Мутаев Аьбдуллагьлул бувккунни шеърирду. «Инсан» фондрал чулуха мажлисрайн бувкIсса цинявппагу хъаннин дуллунни тIутIив. Редакциялул чулуха кказит чичултрал дянив кIуну бувтун пишкаш дурунни кьиматсса бахшишру.
ИМАРА САИДОВА
