ЧIяйннал оьрчIан шадлугъ
«Ккуллал жагьилтурал ккуран» тIисса сакиншиннарал каялувчи Гуйдалаев АьбдурахIманнул сипталийну ва ЧIяйннал имам Багьауддин Исаевлул кумаграйну уттигъанну хьунни ЧIяйннал шяравусса дуклаки оьрчIал дянивсса чIатIаракI ритаврил турнир.
Имамнал оьрчIан дакIнин бувтуна чIатIаракI ритаву диндалуву ххуйчулий ккаккан дурсса дялахъру душиву: «Мусъаьб ибн Сяъдлул бувсъсса хIадисраву увкуну бур: "Зула оьрчIан чIатIаракI ритан лахьхьин бувара, мури яла хъинмур дялахъру". "Аль-Исаба фи мяърифати сахIаба" тIисса луттираву чивчуну бур: "Зула оьрчIан чIатIаракI ритан ва щинавух гьузун лахьхьин буллалияра"».
Турнир дайдишиннин Аь. Гуйдалаевлул ккаккан бувуна чIатIаракI ритаврил кьяйда, баян бувуна ритайни личIлулну бикIан аьркиншиву.
Турнирданул хIасиллу укунсса хьуна:
Мюрщими классирттаву дуклакиминнал дянив ххув хьуна Сутаев Рашид, 2-мур кIану бувгьуна Ибрагьимов МухIаммадлул, 3-мур – Мудунов Валиаьбдуллагьлул.
Хъуними дуклаки оьрчIал дянив 1-мур кIану бувгьуна Сулайманов Гьаруннул, 2-мур – Сутаев Ибрагьимхалилул, 3-мур – ХIусманов Мирзал.
