Аьдатравун дагьсса мавлуд
НицIавкIуллал шяраваллил кьини
1944-кусса шинал, зунттава бизан бувну нанисса чIумал, НицIавкIрав бивкIун бур 57 къуш, яхъанайгу ивкIун ур 231 инсан. ХIакьинусса кьини НицIавкIуллал жямат кIанттул хьуну бур Новостройрай, цайми шяраваллал жяматирттащал цачIуну.
Гъумучату НицIавкIрав буссия так бахьтта гьан шайсса ххуллу. Гъинттул чIумал неххамачIух бульдозер гьан дурну, чIумуйнусса ххуллу бувну, мунийх занан бикIайссия. Амма гьарца гъарал ларчIсса, нех дурксса чIумал ххуллу бяххан бувну, зия хъанай бия. Гьашину Аллагьнал ﷻ цIимилийну ва шяраваллий дакI цIуцIисса инсантурал хIарачатрайну шяравун ччимур машина лагайсса ххуллу хьунни.
Шяравалил аьдатрайн бувну, гьашинугу июль зуруй НицIавкIрав бувссар «шяравалил кьинилун» хасъсса мажлис. Му байран НицIавкIуллал жяматрал мавлуд дурккуну щаллу дувай.
Мажлисрайн бавтIминнал кIицI лавгуна укунсса батIавурттаясса мюнпат хъунмасса бушиву ва ялун нанисса никиран цала буттал буттахъал ватан хъама дитан къабучIишиву. Шяравалу цIу дукканнав, левкьсса къатригу дакьи дурну, хьхьичIава заманнай куннасса, сий дусса шяравалу хьуннав тIий бия.
Шиккува баян бувуна цIу буккан бувну къуртал буллалисса мизитран Дагъусттаннал Муфтий шайх АхIмал-афандинал арцуйнусса кумаг бувшиву ва гьашину мизит тIитIинсса ният душиву.
