Гъумук – хъаннил мажлис

Июньдалул 15-нний лакрал райондалул культуралул къатраву хьунни хъаннинсса диндалул мажлис. Ва щаллу буван бувкIун бия дагъусттаннал муфтиятрал хъаннил просвещениялул отделданул зузалт.

Мажлис байбишиннин Лаккуйн бувкIсса хъамал бивуна АхIмадул-Яманинал ва Гъази-Кьаландардул зияратирттайн, лавгуна щейх Жамалуттин ялапар хъанай ивкIсса къатри ккаккан.

Мажлис бачин бувуна Муфтиятрал хъаннил просвещениялул отделданий каялувшиву дуллалисса Загьра Исмаиловал. Ванил бувсуна жяматраву хъамитайпалул бугьлагьисса кIанттуя ва Исламравусса хъамитайпалул багьу-бизулия.

Мажлисрай махъ лавхъсса Гъази-Гъумучиял имам Сулайманов Ансардул бувсунни укунсса дин-исламрая бусласисса батIавурттал агьамшивруя.

Лакрал райондалий зузисса диндалул просвещениялул зузала Оьмарова ПатIиматлул бувсуна бусурмансса инсаннал хъинсса аьмал-хасият, уздансса тIул-тIабиаьт дикIан аьркиншиву.

Муфтиятрал зузала Аьбдуллаева Хадижатлул бувсуна чак баврил агьамшиврун хас бувсса вяъза-насихIат.

Махъру лахълахъиминнал лях бюххансса нашидру бувккуна Анисат АьбдуллатIиповал ва «Гьидаят» группалул, Гъумучиял душварал бувккуна лакку мазрайсса шеърирду, дуруна викторина.

– Жул нанижат дур лакрал шаннагу райондалийсса душвавращал дахIаву цIакь дуван, уртакьну зун, ва ххуллухсса мажлисгу жува рязину личIансса даражалий лавгунни. Лакрал хъами мудангу гьармуниву хьхьичIунсса, итххявхсса бур, диндалул иширттавугу хьхьичIунну бивкIссар, жунма хIала-гьурттуну къуццу тIун аьркинссар жулла ялун нанисса никирал бучIантIимунил цIаний, ми къаххуймуния буруччиншиврул, исламрал тIайласса ххуллийн бурган буваншиврул, – увкунни Ххадижа Аьбдуллаевал.

Вай душварал буллалисса хIарачат миллатран барачатну хьуннав, вайннал давурттаягу, жуятувагу Аллагь рязину личIаннав!