ЦIУССА ХАВАРДУ

ЦIУССА ХАВАРДУ

НицIавкIравсса ссапар

Август зурул 8-нний Лаккуйсса шяраваллал имамтал ва жагьилтал бивунни НицIавкIуллал шяравун. Вайннал мурад бия шикку цIу буккан буллалисса мизитраву давриву кабакьаву дуван. Ванил сиптачину ия Лакрал райондалул имам МухIаммад Айтемиров. ХIала увххуна Ккуллал райондалул имам ХIабиб Баталовгу, цала жяматращал архIал. «Жу хIакьину буру мизитрава аьрщи дуккан дуллай, чIанкъатта саргъун буллай. Аьрщи дуккан дурну махъ виваллил давуртту дуллантIиссар», - увкунни М. Айтемировлул.

«Заннайн щукрулий буру укун барачатсса кIану ккаккан, даву дуван бювхъунутIий, альхIамдулиллагь», - увкунни ХI. Батталовлул. ДакIнин бутанну, НицIавкIуллал шяравалу хъанахъиссар машгьурсса тIарикьатрал шайх Сайфуллагь-кьади Башларовлул ватан.

Сурхай-ханнал мизит

Гъази-Гъумуксса Хъун-бярнил чIарав буссар аьрщарал чIивисса мизит. Ванин Сурхай-ханнал мизит учай. ЧIарах наниманан шикку мизит бушиву хIисаввагу къашай, амма вив буххарча, хьхьичIазаманнул архитектуралул исвагьишиврул инсан хIайран увай. Мизитрал чIираву бивкIсса чичру дусса чару хIакьину бур МахIачкъалаливсса музейраву бивхьуну. Чарий чивчуну бур мизит Гирейл арснал Сурхай-ханнал бувшиву. Мизитраву бивкIун бур чаклин биссайсса ва чурх шюшайсса кIану, бигьалагай къатта ва цIурихьу. Шиккун щин най диркIун дур Хъун зилулувату. Бусаврин бувну, шикку базаллувун бувкIсса инсантал хьхьу дутан, дукра дукан бацIайсса бивкIун бур.

Гиву хъунисса дувссилул къазаннугу бивкIун бур. Совет хIукуматрал чIумал вания ахъулссаннул, ахънилссаннул склад бувну бивкIун бур. Ми дичланшиврул мизитрал магъулу мукьмурцIусса ккутIгу дурккун диркIун дур. ХIакьинусса кьини цала ватандалий дакI цIуцIисса инсантурал хIарачатрайну мизит бакьин буллай, цIу буккан буллай бур. Гьарманал бивхьусса захIмат чирину лякъиннав! Амин.

Мадрасалун пишкаш

Лакрал райондалийсса «Инсан» фондрал филиалданул баян бувну бия Гъумуксса мадрасалун морозильник машан ласунсса арцу датIлай бушиву. 15 000 дирсса арцу цачIун хьусса чIумал, Щардал шяраватусса инсаннал цала чулуха морозильник лавсун пишкаш бувну бур. Мува кьини Щаратусса хъамитайпалул мадрасалун буллуну бур янна шюшайсса машина. «Инсан» фондрайчIин цачIун дурсса арцу тIурча, харж дувантIиссар ялун нанисса дуклаки шинал мадрасалул аьркиншиннардайн. Бувсса цадакьарду Заннал кьамул баннав!

Кьуръан буккаврил конкурсраву хьхьичIунсса кIану

Уттигъанну МахIачкъалаливсса Хъун-мизитраву хьунни дуклаки оьрчIал дянивсса Кьуръандалул конкурс. Ваниву гьуртту хьуну 3-мур кIану бувгьунни Буршиял шяраватусса лакку оьрчIал Саламов Арсеннул. Идавсил ﷺ хIадисраву увкуну бур: «Зувату яла узданма – Кьуръан буккингу лавхьхьуну цайминнангу лахьхьин буваймари» (АлБухари, Муслим). Цамур хIадисраву увкуну буссар: «Кьуръан ккалай, ганиву чивчумунийн бувну яхъанахъисса инсаннал нитти-буттал бакIрай Кьиямасса кьини нурданул таж бишинтIиссар». «Абудавуд, ХIаким).