ЦIУССА ХАВАРДУ

Динийсса центрдануву мурхьру бувгьунни

Январьданул 4-нний ЦIуссалакрал райондалул жяматрал вакилтал ва имамтал цачIун хьуну бия МахIачкъалалул ва Каспийскалул дяниву буллалисса динийсса центрданувун. БатIаврил мурадгу бия мизитрачIату хьхьирил зуманив нанисса аллеялуву мурхьру бугьаву. «Жу жяматращал шанма гьантлий шиккун зун бучIаву бакIрайн ласарду. Аллагьнайн щукру, тамансса халкь бувкIунни. Мунил мукъуйну бакъасса, даврийнугу чIалачIи буллалиссар жущава Аллагьнал ﷻ ххуллий цачIун хъанан бюхъайшиву. Кумаг буван бувкIсса, чIарав бавцIусса уссурварахь ва ссурваврахь барчаллагь тIиссара. Умуд бур ва центрдануву бюхъайсса кабакьаву мукьахгу дуллансса каши хьунссар тIисса», – увкунни Новостройрал имамтурал каялувчи Мансур Хаваевлул.

Грепплинграл турнир

Уттигъанну Ставрополь шагьрулий хьунни грепплинг журалий лачIун буккаврил турнир Eagle Flight Championship. Ваниву гьурттушинна дурунни щала хIукуматраясса чарххичитурал. Гьуртту хьуминнавух ия лаккучу, Дагъусттаннал Муфтийнал хъиривчу МухIаммад Майранов. Турнирдануву ванал бувгьунни 1-мур кIану. Барча уллай буру жаваблувсса къуллугърай зий унува, спортравугу лавайсса кIантту бугьан бюхълахъисса жула уссу.

islamvlakii.ru

Кубок «Гази-Кумух»

Уттигъанну Гъумук хьунни волейболданул турнир «Кубок Гази-Кумух». Ва турнир гьарца шинал дувайссар «Лакрал жагьилтурал ккурандалул» сипталийну. Ваниву гьурттушин дурунни ЦIуссалакрал, Ккуллал ва Лакрал райондаясса командардал. Цалчинмур кIану бувгьунни ЧIурттащиял командалул, кIилчинмур – Вихьуллал ва шамулчинмур – Ххюлуссуннал жагьилтурал. Шиккува баян бувунни «Лакрал жагьилтурал ккурандалул» каялувчину Хьурттал шяраватусса МухIаммад-маннар Бариев ивтшиву.

Идавсил ﷺ цIанийсса мизитрал къуппа лакрал бувантIиссар

ЦIуну буллалисса Ися идавсил цIанийсса мизитрал дянивмур къуппа (купол) бацIан баву бакIрайн лавсунни лакрал жяматрал. Мунин хасъсса батIаву хьунни Дагъусттаннал Муфтиятраву. Шикку сакин бувунни ялув кIицI ларгсса даву дузал даврил оргкомитет. Мунивун бувххунни республикалул Муфтийнал хъиривчу МухIаммад Майранов, Новостройрал имамтурал каялувчи Мансур Хаваев, Лакрал ва Ккуллал районнал имамтурал бакIчи Шамил БахIандаьлиев, «Лакрал жагьилтурал сакиншиннарал» хъунама МухIаммад-маннар Бариев, Мариян Илиясовал цIанийсса «Дараччи» фондрал хъунмамур Гульшан Хасаева ва цаймигу кумагчитал. БатIаврий ххал бивгьунни бакIрайн лавсъсса къуппа дувансса арцу цачIун даврил масала.

Барчаллагьрал чагъарду

Дагъусттаннал Жагьилтурал министерствалул къатраву хьунни пандемиялул чIумал хъуннасса чирилул даву дуллай бивкIсса «ЦачIу бюхъантIиссар» тIисса лакрал жагьилтурал фондрал вакилтуран бахшишру дуллалисса мажлис. Давуд Амировлул каялувшиннаралусса ва фондрал март зуруя байбивхьуну, шин къуртал хьуннин бувссар цимивагу чирилул акция. «Жува цачIу буссару» тIисса цIанилусса Щалагу Аьрасатнал проектравух хIала бувххун, лакрал жагьилтурал дурсса даврин лайкьсса кьимат бивщунни хIукуматралгу.

Ва кьини волонтертурахь барчаллагь тIисса ихтилат бувунни жагьилтурал иширттал министр Камил Саидовлул ва мунал кумагчи ПатIимат Оьмаровал. – Жула халкьуннайх кьини дурксса чIумал зу дурсса даврин багьа бищун къашайссар. Зу ккаккан дурунни зунттал агьулданул яхI-къирият, узданшиву, чумартшиву. Зула оьрмурдан ва цIуллу-сагъшиврун нигьачIаву дусса тагьарданий зу кумаг буллай бияв захIматшиврухун багьсса инсантуран. Бугьарасса, кьатIув буккан къахъанай ливчIсса инсантурачIан шаппашаппай занай, диян дуллай бияв дука-хIачIанмур, даруртту. Та ппурттуву зу тирх учин дурунни нигь-ццах дагьсса инсантурал дакIру. Умуд бур жува уттиния тихунмайгу цаннан ца бувчIлай, хIала-гьурттуну зунссару тIисса, – увкунни Камил Саидовлул. Ванал буллунни чирилул давурттаву чялишну гьуртту хьусса 21 волонтернан Дагъусттаннал БакIчи Сергей Меликовлул чулухасса Барчаллагьрал чагъарду. Волонтертурал цIания Давуд Амировлул барчаллагь увкунни министрнахь гьарица цала дуллалисса давурттал чIарав ацIлай ивкIун тIий.

ЛАЖИН ХIАДУР ДУРССАР И. ОЬМАРОВЛУЛ