Дунияллул рекордрачIан гъанну

Гуж-цIакь бусса спортсмен, ккуличу Султан ХIусмановлул баян бувунни цува Гиннесслул рекорд ккаккан дурсса британец Стив Килердуяр хьхьичIун уккан хIадурну ушиву.

Султан ур спортсмен-пауэрли́фтер. Ва хъанай дур кIушивуртту гьаз дувайсса спорт. Ванил мяънагу – инсаннаща шайсса яла захIматмур кIушиву гьаз даву. Султаннул цимилвагу бувгьуну бур хьхьичIунсса кIантту кIушивуртту гьаз даврил бяст-ччаллаву, турнирдаву, пут личавриву ва цаймигу жула миллатирттал спортрал журардаву. 3-ла хьуну ур Дагъусттаннал чемпион.

ХIакьинусса кьинигу Султан ур школалий физкультуралул дарсру дихьлай. ОьрчIру тарбия бавриву бувсса хIарачатрах ва тамансса грамотардан лайкь хьуну ур. Цалами оьрчIругу чан-чанну спортрахун бичлай ур. Арс занай ур лачIун буккаврил секциялийн, душгу цания-ца спорт язи дугьансса пикрилий бур. Ва ишираву яла агьаммур – анавар къабувккун, оьрчIан гьарца чулиннайсса тарбия дуллуну, итххяххан бавур. ЛяличIисса къулагъас дуван аьркинссар жула аьдатирттах ва дин-исламрал тарбиялух.

Лавхъун ур Султан Эльбрусрайнгу. ЧIивинияцIа зунттурду ххирасса, лахънийн лахълай аьдатсса ванал хIукму бувну бур чIявуминнаща лахъан къавхьусса зунттул бакIрайн гьаз хьун. Хасъсса хIадуршингу дакъанура, цащала личIисса дуки-хIачIиягу къаларсун Эльбрусрайн авчуну ур. Ряхра ссятрал дянив ивну ур мицIлийн, цукунчIавсса захIматшиву къархьуну.

Султаннул ца кIиссурах 120 кило дусса кIушиву гьаз дурну, 8 секундрай авцIусса видео ва ванаясса передача дур «Ислам в Лакии» (islamvlakii.ru) порталданий. «Guiness World Records»-рал баян бувну бур Стив Килердул декабрьданул 1-нний, 129 кило ва дачIи дусса пут гьаз дурну, дунияллул рекорд ккаккан дуршиву.

Ванаяр хьхьичIма рекордсмен Беник Исраеляннул 2011-ку шинал ца кIиссурах гьаз дурну дур 121 килограмм. ЦIусса рекорд ккаккан дуван Стив Килер шинал лажиндарай хIадур хъанай ивкIун ур. Гьаннайсса, Султан цува ва рекордрачIан гъанну ушиву баян буллай ур. ЧIа учинну ва цIакь бусса, кьянкьасса чувнан Стивлуяр хьхьичIун уккансса тIайлабацIу.