Спортрал бяст-ччаллу

МахIачкъалалив хьунни лакрал дянивсса теннисрал ва чIатIаракI ритаврил турнир. Ванил сиптачиталну хьунни Ккуллал, Лакрал ва ЦIуссалакрал райондал жагьилтурал ккураннал каялувчитал – Гуйдалаев АьбдурахIман, Акаев Жамалутдин ва Рамазанов Минкаил.

Турнирдануву гьурттушин дурунни Муфтиятрал зузалтрал, мизитирттал имамтурал, жагьилтурал, бугьараминнал. Бяст-ччал баврил агьаммур мураднугу кIицI лавгунни жямат цачIун баву, миллатрал дянив уссушиву цIакь даву.

Турнирданул дайдихьулий махъ лавхъуна Ккуллал райондалийсса Муфтиятрал просвещениялул отделданул зузала МухIаммад Сулаймановлул ва ЦIуссалакрал райондалул жагьилтурал ккурандалул каялувчи Минкаил Рамазановлул.

Цинугу гьурттушин дуван бувкIун бия 60-ннийн бивсса инсантал.

ЧIатIаракI ритавриву ххув хьунни ЦIувкIратусса Халилбеков Мурад, 2-мур кIану бувгьунни Маллаев Камиллул, 3-мур – Ури-Мукьардал шяравасса Рамазанов Минкаиллул.

Теннисрай бувккун цалчинмур кIану бувгьунни Хъусращатусса Дадукубаев Марислул, 2-мур – АьбдурахIимов Сиражуттиннул, 3-мур – Кьурбанов Маратлул ва Аьлиев СалихIлул.