Бугъ’ятуль сааьлук – Пакьирнал мурад

(дайдихьу хьхьичIми номердай)

Аввабинтурал чак тIий ххирасса нафилари,

Магърибрал ва эшаърал чаклил дянив бувайссар.

Ибну Аьббаслуяту сахIихIсса хIадис бури,

Миннул ялув авцIунал гьарца бунагь шюшайссар.

Ибну Оьмардул бувсри Идавсияту хIадис

Хъусливу, диндалуву Заннал уруччин айссар.

Мукунма агьлу-авлад, ххишалларан чIаххулгу,

КIивагу къатлул дянив Заннал буруччин байссар.

МаркIачIая хъатIаннин иътикафрай ацIарча

Ххишала калам бакъа зикру-Кьуръандалияр.

СахIихIсса хIадисрайну Цала риза архIалну

Алжаннавун уххан ан Аллагьнай хIакьну шайссар.

Тагьажудрал чакливу фазилартту чIявури,

Хьхьу уттара дуваврил даражартту хъуниссар.

Циксса хIадисру бури аятругу архIалну,

Даражалул хъуншиврул хIисаврагу дакъассар.

Хьхьуниву бай чакурдил бунагьру кьатI бувайссар,

Сифатрал нур ххи шайссар, баракатгу аьм шайссар.

Пакьир хIарачат бува ва даражалийн иян,

Ванил агьлу хьуманахь Заннал башарат бувсъссар.

Мунил ялув авцIунан бангу муваффакь шайссар,

Бунагьрал ва лагъвийрал муния махIрум айссар.

Даин ялув авцIунан рияъгу къаличIайссар,

Рияърая нигьачIий кьабитан къабучIиссар.

Сивак даин дулукки гьар байсса чакурдичIа,

Оьзру бакъа ухьурча, мунил чири хъунмассар.

Кьуръандалул фазила Заннан бакъа къакIулссар,

Кьадим Заннал каламри, кьимат буван къашайссар.

ДакIгу чурхгу марцI бувну Заннащал гъалгъа тIаву,

Пикри бува багьадур, цуксса ажру бикIанссар.

ХIамалатул Кьуръантал Заннан ххирасса халкьри,

Ява мулазама хьу, ЗанначIа сий хьунтIиссар.

Миннан бусса чирилул хIисав щил дуванссари,

Мивусса хIадисирттал хъунишиврул ккал дакъар.

«УбсутI яминака» куну, Заннал хитIаб дантIиссар,

РизвануЛлагьри цин цIа, ва неъматгу вин гьассар.

Ризван хулудрая махъ миннан дулунтIисса нур,

Бургъиял ххишалассар, ялагу ххишалассар.

АрулцIалазараксса малаиктал архIалну,

РизвануЛлагь архIалну Алжаннавун гьантIиссар.

АрулцIалазараксса сурат ххуй малаиктал

Заннал гьадиятращал минначIан занантIиссар.

Жува кутIа буванну ва кIанттайсса хIадисру,

Калам чIяву циванни, агьлуЛлагьтал учайссар.

Миннан бусса даража нитти-буттангу буссар,

Миннал хIурмат бувара, барачат биянтIиссар.

Вай на вихь бусай калам щялмахърайсса бакъассар,

Амма нифакьрал заллу инкарданий ивчIайссар.

Инкар хIучча кьабити, мукъурттих маургара,

Вия махъ увкуссаксса вин даража хъунмассар.

Инава ххассал хьунсса ххуллийн агьан яхI бува,

Заннал фазлу хъунмассар, рахIматрал чявхъа байссар.

Вай агьлуЛлагьтуращал хIала изан вин ччарча,

Гьар ккавксса инсаннащал хIусну-занну шартIссари.

Инсаннай аьй мадара, аьй вила чурххай дува,

Миннащалмур ххуй баву Халикьнащал бавури.

Оьккимур таъвил бува, ххуймунин хIамлу бува,

Саттарул-оьюб Заннал виласса бантIиссари.

ДакIнил кьамул къабарча цаманал бувцу оьзру,

Аьйб вийра лачIун дарча, Зал ххуйну уругайссар.

Гьарица ккавксса инсан Хизри куна хIисав да,

Дуаьлий васият ба, барачат бияйссари.

Аллагьнал авлияътал Цанма бакъа къакIулссар,

Вил ихлас камил хьурча, вингу ххал хьунтIиссари.

Мурид мурадну шайссар, мурадгу барт лагайссар,

Мурид хьуну ччиманан ижтигьад аьркинссари.

Муриднал даражарттал аькьабатру буссари,

ХьхьичIва-хьхьичIмур аькьаба – дуньял кьадитавури.

Дуниял ва ахират машрикь-магъриб куннассар,

Ца канил дургьуманан кIамур личIи шайссари.

ДакI дунияллий дуна муридра тIий уккаву

Ужра бакъа пишалий оьмру зия бавури.

Муридшиврул даража ЗанначIа хъунмассари,

ХIакьсса муридну хьурча, му Заннангу муридри.

Мунал гъайбат – хIузурди, мунал кьурба – шугьудри,

Мунал дакI нуранийри, Зал акъа къакIулссари.

Я аьфву ххисса Заллу, я цIими ликкай РахIман,

Жугу миннаву барча, вил фазлу аьм хьунссари.

Халкьуннал изаърачIа ссавур цIакьну дуручча,

Изаъ къаккавксса идавс цаягу къавхьуссари.

Вай цинявннул бакI аьмал ххуй бан хIарачат бува,

Аьмалданул суратрай изангу антIиссара.

Пикри баврил шартI мури, гьар муриднай важибсса,

Сирру ва аьланият муттафакьну аьркинссар.

Чищалмур муаьмала низамрай аьркинссари,

Чий оьккину ххал шаймур инава къабан ччиссар.

Вила чурххан чисса зад цаманагу къаччарча,

Му иман нукьсаншивур, микку вил дазу шайссар.

Муфлисну оьрму лавгсса махIрум-пакьир Сайфуллагь,

Вийва хIуччану шайсса вяъзалул вин ци байссар.

Вила чурххал къабаймур чийхь буслан ци аьркинссар,

Вил оьшиврул цIания цаняннан машгьур хьуссар.

Вила оьшиврухлуну душманнувасса ина,

Ина ккаккан бай ххуллу мавэзану щин шайссар.

Гьарица инсан ури муридшиврийн кIункIу тIий,

Муридшиврул цIа хьума цIанакула щейхра тIий.

Гьай мискин ибну Адам, вил бакIрайсса ягъилух,

Мукссава гъапулсса вийн аькьил цукун учайссар.

Истикьамат дургьусса ца мурид ккаккайния,

Заннахь чIа тIутIи мурад хьунссия ттун мусяссар.

Мунал ччанналу кьяркьи янил ссурмав бавияв,

Мунал асар бавияв хIужжалун аьйнул хабар.

Шейхшиврул цIа ласавай, дуниял цачIун давай,

НукIу хIарамми хъусгу утти хIалал хьуссар тIар.

Утти хIарамсса хъусгу шанма мукъул хIалал дай,

Дирирмур цачIун дувай, миннул бунагьгу бакъар.

(гихунмайгу буссар)

Щайх Сайфуллагь-кьади Башларовлул луттирава