Бугъ’ятуль суълук – Пакьирнал мурад

Уттисса тlарикьалийн муджаддадий учайссар,
Халидиягу чайссар, бакl Шагь Халид унутlий, 
Джагьрийну байсса зикру муная махъ бакъассар,
Даим вакьт фана давур, «Аллагь-Аллагь-Аллагь» тlий.
Ванил машраб къакlулма джагьрулий вев тlун икlай,
Цанни цири учирча, вагу ца машрабри тlий. 
Мяйжансса тlарикьардан гьарцаннин машраб буссар,
Халидиярив кlулша, сиррий зикрур «Аллагь» тlий.
Муриднан асар шаву усттарнал сирру буна,
Мунийн хlучча ккаккан бай джагьрулул асар бур тlий.
Жува цlакьну бугьанмур Шагь Халидлул каламри,
Мунилмур тагъйир буван жула кьудрат дакъатlий.
Джагьру хlала бачин бан ххуллувагу къабулай,
Нажагь хlала буварча талфийкьу зикру шай тlий.
Цала вирд къуртал хьуну, муршиднал амру барча,
Микку муршиднайн мурид хьун ялувссари мютlий.
Замандалул пакьиртал къакlулссар жунма цичlав,
Уттигу къакlулхьунссар, кlулсса жуна акъатlий. 
Жула бансса бакъари гъапулсса дакlурдищал, 
Цlими ликкай къапулух бацlанду леххаву тlий.
Хlая дакъа аьдатсса, кьавкьмасса ярундищал, 
Тавхlид цlакьлин дургьуну, цlими ликки Аллагь, тlий.
 Вил хlилмунийрухха жу хъяврин хьусса Заллуй,
Джавадун-Каримрачlа махlрум мабара жу тlий.
Тlарикьатрал адабру кlулшаву важибссари,
Хlакъирайну дугьарча, вин хlадурсса неъматри. 
Щейхналссагу адабру хъиннура важибссари,
Карчlаншиву дуварча имандалун нигьссари.
Гъафуру-ррахlим Заннал мусамахlа ххиссари,
Шайхналмий хIукьукьирттан тавбагума щакссари.
Муридналсса адабру хъиннура чlяруссари,
Дакъа чара бакъамий хlифз дангу аьркинссари.
Пикру цlакь бан аьркинни адабрай ацlавриву,
Муваффакь хьурча вил нафс, завкьирал дулайссари. 
Адабрал яла хьхьичlмур, тавба марцlну давури, 
Асбабирттал бакl мури, дакlгу фатхlу шайссари.
Насухlий тавбалийну ина фаизну хьурча,
Мури вил мурадрал бакl, икьбал камил хьуссари. 
Оьккимур ххуй хьуссари, ххуймургу нур хьуссари,
Вил зумату бувк калам Заннал тlайла байссари.
Мунил щартlирдаятур бувмуний пашманшиву,
Кlилчин къабан кьаст давур цlакьну ацlан аьркинссар.

(гихунмайгу буссар)

Щейх Сайфуллагь-кьади Башларовлул луттирава