Бугъ’ятуль сааьлук – Пакьирнал мурад
Бугъ’ятуль сааьлук – Пакьирнал мурад
(дайдихьу хьхьичIми номердай)
Мунихлунур увкусса баъзул аьрифинтурал
Каза́ удабаътурал, хIакьмургу миннал махъри.
ХIакьи́кьийсса исламрайн вусул къашай аьбд мури,
Ма сива Ллагьраяту дакIниву хIаз бумари.
Тасвилу нафсирайну цIансса басиратрайну
Вусулданийн кьаст дуллай гьалак хьуну лавгмари.
Хатмул-Хаваджака́н
Хатмул-Хаваджака́н тIий, ца истIила́хI дуссари,
Ва кьавмдалун мурадсса файзирангу сабабсса.
Дуаь мужабсса кIанур, файзран сабабсса кIанур,
Адабрай авцIуманан хIакьну рахIмат ликкайссар.
Цал хатмугу дурккуну муриднан таважжугь бан
Цанна маъру́ф гьайатрай вайннал ижтигьад дуссар.
Мунин кIира шартI дуссар риаьят бан багьайсса,
Авс ибну Шаддадлуя Идавсин ﷺ санад дирсса.
Къатлул хьулу лакьавур, цивппа кьарар хьуну махъ,
Ажнаби къауххавур му ххуттаву акъасса.
Адабругу дуссари муниву агьам дурсса,
Риаьят дувара тIий цивппа ялув бавцIусса.
КIивагу я лакьавур яла истигъфар бавур,
Кьуния ххюйла чавур минначIа сабит хьусса.
Аьксу таваррукрайну ялагу щяикIавур,
Арила «АлхIам» букки, мугу арканнаятур.
ХIалкьа хъунну духьурча, урчIа чулийнал буккин,
Му афзалмур важгьури, адабну ккалли дурсса.
ФатихIарая мукьах ттуршила салаватри,
Ци ссигълуй дутарчагу, варидмур афзалссари.
АрулцIаллий урчIила «Алам нашрахI» буккаву,
Яла азарва «Ихлас», цагу зияда бувну.
Арилва «АлхIам» букки, нукIу бувккусса кунма,
АсхIабул ясартурал хIалкьа хьурча хъуннасса.
Яла ттуршра салават гьадият дуванссари,
Шайхтурал арвахIирттайн силсилалув бухьусса.
Яла дуаь данссари хузуъ инкисарданий,
ЦIими ликкайсса кIанур, хъинну адаб аьркинсса.
Чансса нахIу садакьа булаву ансаб хьувкун,
Таъзимрай му букаву адабран ккалли дурсса.
Вукьфул кьалбилийну кьалбирайн назар даву
РабитIатун шарифа мурадри вин хъунмасса.
Каза́ вукьуф лазимссар Кьуръан хатму бавриву,
Микку дур пикрилулли файз ялун диян дайсса.
Аьвамтурал алфазру хаввастурал тадбирди,
Хаввастурал аьдатри загьир ккалли къабайсса.
Ахассул хавастурал дакI танаббугь дувавур,
Таважжугьрай ацIавур, затирайн мукьаддасъсса.
Цала кьалбиравун нур ликкаврий дакI дарцIуну,
Илагьийсса файзирайн назар дан умуд бувсса.
АрвахIу-ссадаттурахь таважжугь файз тIалабрай
РухIани хIузур шаврий данссар иътикьад цIакьсса.
Уттавасса, ливтIусса авлияъ-са́даттуран зиярат баву
Уттавасса, ливтIусса садаттуран зиярат
Баврил адаб бусанна, вичIи диша баянсса.
Аввал ният ихлас дан валиюллагь ушиврий,
Щак-шубгьа дакIний бакъа авлияътурал цар тIий.
Дуньявий-ухравийсса цамур гъараз вив бакъа,
Зал рязи шаву бакъа цамур матIлаб бакъатIий.
ИмтихIаний фархIрая, тафарруж кьасдирая,
Караматрайн тIамъ бакъа, назармур давур кьатIъий.
Миннайн имтихIан буван муриднан къабучIиссар,
МумтахIин малъоьншиврий бавцIусса кьавл бунутIий.
Карамат шартI дакъассар вилаят афзалшиврун,
Истикьаматрал мадар ирфан якьин бунутIий.
Ялагума бучIиссар катму маъмурну икIан,
Мунивусса афатру миннан чIалай бунутIий.
КIилчин адаб за́ирнай – тIагьарат камилшивур,
Гьар эбадатрал мабна́ тIагьаратрай бунутIий.
(гихунмайгу буссар)
