Бугъ’ятуль сааьлук – Пакьирнал мурад

Бугъ’ятуль сааьлук – Пакьирнал мурад

(дайдихьу хьхьичIми номердай)

Тавба-истигъфардайну иза́ла дан къахьурча,

Фаврданий дафоь дуван муршиднайн аьлтту банссар.

Мунахь хIакьмур къабувсун оькки-ххуй кьюлтI буваву

Файзирал баб садд хьуну, махIрум хьуну личIайссар.

Мубтадиътал кьабити, мункирная арх уцу,

Миннал кьасават щуну муриднал нур лещайссар.

Мункирнал дур дукралул, каза хIарам лукьмалул

МукьцIалла кьини мунан файзрал къапу бащайссар.

ЗихIку-гъазабраяту чурх буруччин къабарча,

Щинал цIунияр ччяни нибатрал нур лещайссар.

Мунагьиртту кьабити, фузулдайн мауххара,

«Тарку ма ля яънигьи» хIуснул исламну шайссар.

Оьмру аьзиз давлатри, вакьту жавгьар нафисри,

Фурсагу гъаниматри, хIарачат бан багьайссар.

Вайннал хIакъиравусса хIадисру ва аятру

Шикку къачичларчагу, цаняв сарихIну шайссар.

Мукьулчинмур адабрал – адабул мукалама,

Устарнал изну бакъа бувсса калам лагъвийссар.

ЧIу бюхттул къабуванссар, увкумур тIайла банссар,

Муршиднал був каламрайн лима́-ла́гу къачинссар.

Вихьва амру бувну махъ суал гьарза къабанссар,

Аьркин бакъамур цIухлай инжитгу къауванссар.

МакI таъбир да къачинссар, гъайбий буси къачинссар,

Кашфу-карамат ккаккан ччишиву кIул къабувайссар.

Балики изну хьуну кашфу загьир дуварча,

Нукьсан лазим къадайссар, ялагу маслихIатссар.

Яькин эрфаннал кьувват загьир баву дунугу,

Карамат афзалшиврун цичIав важгьу бакъассар.

Карамат загьир шаву загьид мухIибнаятур,

Аьрифнал караматрайн илтифат къадувайссар.

Караматрал кьувватрал щинал ялтту лавгнаяр

ХIаялий чIа къакуну мякьлил ивкIума ххиссар.

Гьарца баймур задиран щейхнал изну чIа чинссар,

Изнулий був иширттал баракат загьир шайссар.

ХIаялий хIайран хьуну, оьттуйну макь дуртIуну,

ХIал, кьавлу кьюлтI къабувну, сирру бусан аьркинссар.

Нажагь муршид учIарча муридначIан иширай,

Ружуърай амру баннин мунал хъирив ачинссар.

Му кIура аяй чIумал, канийн ппайгу увкуну,

Янила гъайбат хьуннин мустафизну ацIанссар.

Ххюйлчинмур адабирайн адабул-хидмат чайссар,

Нафсирайну, хъуслийну хидмат буван багьайссар.

Муршиднан бувсса хидмат Идавсин баву шайссар,

Идавсихлу бувмургу Аллагьнайн кIура шайссар.

Мунаха бувсса къуллугъ неъматну хIисав данссар,

Ужралийн хьул биширча, самму кьатилну шайссар.

РухI талаф къадарчагу мунал бувсса амрулув

ЛахIзалий къаавцIуну барт лаган бан аьркинссар.

Му усса мажлисраву бакI кIачIа къабуванссар,

ЩяивкIун чул бивщуну ччан тIитIи къабакьинссар.

Мунал щугълу къабагьну муначIа чак къабанссар,

Шаръийсса заруратрив ада́ъ дуван аьркинссар.

Цуксса бувсса къуллугъгу кьусурну ккалли бувну,

Мунан маслихIат шайкун хIарачат бан аьркинссар.

Щейхнал хатIир бастI хьуну, башашат загьир хьуну,

Файзиран сабаб хьуну, сармадирай личIайссар.

Малданийсса адабру: иътикьадрай икIавур

Щейхнал баракатрайну Заннал неъмат буллуссар.

Муриднал дуллусса зад муршиднал кьамул дарча,

Мугу хъуннасса фазлур, щукру баву ялувссар.

Бувайсса аьмалданув ина ихлас дуварча,

Вила щейхнайн укунма мунал щейхнангу шайссар.

Му куццуй му гьантIиссар ИдавсичIан бияннин,

Идавсин кьамул хьувкун, Заннал ризван дияйссар.

Машрикь-магърибрайн аьмну муршидная лирчу нур

Кашфулул агьулданун загьирну чIалачIиссар.

(гихунмайгу буссар)

Щайх Сайфуллагь-кьади Башларовлул  луттирава