Бугъ’ятуль сааьлук – Пакьирнал мурад

(дайдихьу хьхьичIми номердай)

ХIузур ккалли къашайссар батIин агьулданучIа,

Гъафлат, хатIрат, иътираз нажагь дакIнин дагьссаксса.

Мунил диян дувайссар муршиднал дакIнин нафрат,

Миккур шайхнал янила мурид сукьутIну шайсса.

Муршиднал дакIнияту микку мурид агьарча,

Муриднан бусса махIал дакIния ха́лий шайсса.

Арулчинмур ссавния лув лухччинийн агьаву

Шайхная агьаврияр мури мунан захIматсса.

Заннал буруччин баннав миккусса сукьутIрая,

Аьйнуллагьрая сукьутI мунийнни миннал чайсса.

ХIузур забитIа даву вукьуфул-кьалбирайну

Файзран истимдад бавур, гъафлат экьи лирчусса.

Вусул шаву шартI дакъар якьин архIал бухьурча,

БатIиний файз ликкаврин муршиднал файзирайсса.

Лахъи дан къабучIиссар муршиднащалсса хIузур,

ЦичIав ялун къабиян мунал дакIнин къаччисса.

Ина хъяврин машара шайхнал загьирданийну,

Укун цанни-цири тIий. Му элмур мунан кIулсса.

Укун вай ишру буна, файз ци тIалав да́ви тIий,

Му иътикьад лиявур, мунийнур махIрум шайсса.

Иътикьад мукун ччиссар ва акъа акъассар тIий

Лухччи-ссавнил дяниву Аллагьнайн вусу́л айсса.

Чурххавусса рухIнияр муршид ххира шаврищал

КIул хьун цанма аьркинни му ризарайнур хьусса.

Аллагьнайн вусул шаврин ва́ситIа муршид хьувкун,

Му ина рязи арча, Идавсгу ﷺ рязи шайссар.

ХIузур гъайбатрай ур тIий, сатIватрая уруччу,

Жасусул-кьулубри му, гьарзад мунан аьянссар.

Ява хъяврин машара хъян ивкIун був каламрай,

Инава хъун увнутIий – му вин загьруну шайссар.

Муриднал ахIвалдая каза́ аьмал ххал буллай,

Мунан имтихIан буллай муршид ха́лий къашайссар.

ХIикаятру чIявури миннул хIакъирав бувсъсса,

Файзран дазу кIул шаву луттирдайну бавцIуссар.

Муршиднан нафрат шаву, хатIрат-иътираз шаву,

Баркьийсса загьрури тIий аьрифтурая бувсъссар.

Тасвилу нафсирайну, кайди щяйтIан ххи хьуну,

Миннайн инкар буварча, су́ул-хатимат шайссар.

Хизрил ва Мусал кьисса пикри бувну ххал бува,

Вайннал сиррулул хъирив цама лаян къашайссар.

Идавсил асхIабтурай хIудудру дацIан дурссар,

Ражму, кьатIоь цаймигу, эсмат шартI дакъассари.

Нажагьлий шайх агьайссар кабира бунагьравун,

Мугу Заннал кьадарди, иътираз къабучIиссар.

Исрар мунан дакъассар, ччяни тавба дувайссар,

Инкару тазарруърай надаматай ацIайссар.

Мунихлунур увкусса Ибну АьтIаиллагьлул

«ХIикам» тIисса луттирай, ургарча пайда хьунссар.

Эззу истикба́р дусса дуллали тIааьтнияр

Зуллу-инкиса́р дусса мяъсият хъинссар куссар.

Мунихлуну увкуссар арбабул-кьулубтурал

Вали́йю таиб хIакьну къаагьнаяргу ххиссар.

Сифат-аьмалдануву кIиягу саваъ хьурча,

Шиддатул-хавфрахлуну таиб афзалну шайссар.

Утти ва замандалув личIисса зад ххал хьурча,

Шаръиран кьабулнугу учай ва къадурусъссар.

Ххуйсса дукра дукарча, марцIну янна лаххарча,

Истикьамат дунугу, дурусрив тIун бикIайссар.

Жагьлулул тафридшиврул ца суннат кьабивтманайн

Ягу мубахI бувманайн мунафикь ур учайссар.

Ва адабрал дяниву кIицI дан ялувсса задру

ВичIи диша, пикри ба. Бусанна, вин аьркинссар.

Муршид щяивкIу кIанай щяикIан къабучIиссар,

Дукра дукан архIалну гьичвагу къабучIиссар.

Балики амру барча, вихьва ва ба увкуну,

Мунал амру бувну махъ увкумур важиб шайссар.

Мунал чай буртти икIан, мунал ларх янна лаххан,

Муршиднайн такьлид буван муридрнан къабучIиссар.

МахIзул кьудратраяту миннал дувай афъаьллайн

Такьлид буллали мурид ахир зиндикьну шайссар.

Мунай икрагь дакъассар, танбигь-таъзир бакъассар.

Мунаяту буккаймур лутIфу ва фазлу шайссар.

Мунал щар къадуцинссар, нинуну хIисав данссар,

Му утту ишай шаний уттугу къаишинссар.

ХьхьичI буртти къаикIанссар шайх буртти икIай чIумал,

Мунияту ликкайни хьхьичI ликкангу аьркинссар.

Шананнин къашананссар мунан хадимну хьурча,

ХIажатханттувн наникун ххуллийгу къаацIанссар.

Мунал халаърайн лавгун кIущингу къабуванссар,

ХIатта сахIраърайвагу чIалай щякъаикIанссар.

ДакIнийсса хатIаратру, цайми бусай ишругу,

ХIатта бунагь барчагу кьюлтI бангу къабучIиссар.

(гихунмайгу буссар)

Щайх Сайфуллагь-кьади Башларовлул луттирава