Бугъ’ятуль сааьлук – Пакьирнал мурад

(дайдихьу хьхьичIми номердай)

Дару бакъа цIуцIавур цама хIакьир уваву,

Заннал сситтун лайкьмари, гъалгъа тIима рихшантрай.

Му цIуцIаврий даинма́ дуниял ччишиврущал,

Макру-хадиаьтращал хIасад гъиллу хIукьдирай,

Бабул хIазратрай бавцIу Заннал малаиктурал

Заннал тIааьтрай бавцIун, ми агьлу байщун байссар.

Илагьийсса хIазратрал худдамнал изнулущал,

Даимссар батIин марцIми хIазратрайн буххан буллай.

Аьбиднал дакIнил кьюлтI дурсса нифакьий хабаисру

Ца кьини мунил асар базурдай загьир шайссар.

Кьуддусийсса къапулийн садаттал гъан хьуссаксса,

Инкисар ва ифтикьар ялагу чIяру шайссар.

Сиям-кьиямадалийну, аьмал чIяву баврийну

Таваззуъ карам дакъа салик вусул къашайссар.

Мунихлунур увкусса гъавси Аьбдулкьадирдул

Саликнал аслу гъирас тавазуъ карамрайри.

Макьамул камалданий саликнал манзил хьувкун,

Хайрданийну бакъасса чурххал амру къабайссар.

Заннал макьамрал нигьал гьавалия айщунан

Жаннатул маъвалийну вяъда Залуннал бувссар.

Мунихлунур увкусса хъуними садаттурал

Нафсирайн хилиф шаву эбадатрал бакI шайссар.

Муриднал хIал ххуй шаву – цана цува кьюкьавур,

ХIалдал тагъйир къаарча, мурид учин умудссар.

Утти жува бусанну чансса бахIс адабрая,

Хъинну чара бакъами тартибрай кIицI лаганну.

Ташриф бара уссурвал, цIимилийну бурувгун,

Оьккимур ххуй бувара, хъиннува рязи хьунну.

Щил баххана барчагу хатIамур савабрайну,

Инсан хатIалул заллур, мунан хадимну хьунну.

Аввал адаб нийятри, хъунмур аслугу мури,

Нийят дакъа був аьмал хIисабраву къабанну.

Мукьадасъсса затирайн дакI кIура даен даву,

Садикьнал ниятрайну, муршидналли асарду.

Садикьнал нийят мури, ихлас кьалбул аьмалли,

Кьалбирайну був аьмал ЗанначIагу кьамулссар.

КIилчин дуваймур адаб – рабитIалул адабри,

Хазанатул хияллал назар дулаврийн чайссар.

КIивагу янил дянив муршид кьарар увну махъ,

Назар ита даркьуну файз тIалаб даврин чайссар.

Таззаруъ-инкисардай мулахIаза дуваврин

Каърулийн нузул дурну, нузулул-кьалби чайссар.

Вила джирьян дуваву дакIнищал нузул хъанай,

Вужуд гъайбатну хьуну, Заннайн сайр хIасул шайссар.

Ва вукьуф жамъ дуварча рабитIалущал архIал,

Нузулун-баркьи шайссар, макьсудгу хIасул шайссар.

Ва рабитIалул аслу Китаб ва суннатрайнур,

Мукунма кьиясгу ди, щак учин къабучIиссар.

Мунил санадру буслан шикку манзил бакъари,

Миннул тафсил булларча, хъиннува лахъи хьунссар.

Ва муршиднал хидматрай зикрурдал адабраву,

Риаьят бан багьайсса цаймигу ишру буссар.

Гьарца бунагь кьусурдал, тахсирдал аьфву ба тIий,

Даим чаклин ивссуну истигъфар цIакьну банссар.

АцIния ххюйла ягу кьуния ххюйла хьуннин,

Истигъфар бувну мукьах Кьулгьу-АлхIан буккинссар.

Ми гьадиятну банссар муршиднал рувхIанийлун,

Машьюлийн шуруъ хьуннин вай шанмагу аьркинссар.

Гъаят-тазарруърайну, инкисаргу архIалну,

Муршиднал кьалбирацIун дакIнил рабитIа данссар.

Ихласрал важгьулийну махIаббатгу архIалну,

РавхIаний личIи къахьун якьиндалий ацIанссар.

Микку рувхIанийтуран хIижаб хIажиз дакъассар,

Муриднал дакIнил хIузур лахIзалияргу ччяссар.

Якьзат, манам – гьар хIаллай къашай хьу хIузур

Садикьсса муриднаву сармадийну шайссари.

ЛахIзалий гъайбат хьурча муриднал дакIнияту,

Цала муршиднал хIузур – мурид акъар учайссар.

Муршиднав фана шаву Идавсиву шавури,

Даваул мушагьада мунан нисбат дувайссар.

Мунихлунур увкусса арбабул-кьулубтурал

Расул хIижаб хьусса нафс бусурман бакъар куну.

Шамулчинмур адабгу – «адабул хIузур» чайссар,

Файзирансса вукьуфри загьир батIин архIалсса.

Янил назарданийну важгьирах къаурувгун,

Мунал хьхьичI вукьуф хьунссар, лагъ куна абикь хьусса.

Тахсирду чIяву хьуну хIакимначIан увцусса,

Ххяххансса кIану бакъа баймуниву хIайрансса.

Муная амру бакъа микку щякъаикIанссар,

Каламгу къабуванссар, цIувхху жаваб дакъасса.

Я цаманащал гъалгъа, цама щайх ухьурчагу,

Я илтифат къаданссар, щайхнал дустур бакъасса.

ДакIнил муршид хъун аву хIакьну Мавла хъун авур,

Микку тазарруъралли файзирал асар шайсса.

Муршиднащал тасарруф, мунащал муаьмала

Идавсил ﷺ варисрича, мунащал кунма шайссар.

(гихунмайгу буссар)

Щайх Сайфуллагь-кьади Башларовлул луттирава