Бугъ’ятуль сааьлук – Пакьирнал мурад
Бугъ’ятуль сааьлук – Пакьирнал мурад
(дайдихьу хьхьичIми номердай)
АцIния урчIучинмур – Аллагь тамассук авур
ХIусну-занну архIалну, Заннал фазлулийн хьулсса.
Фазлу дакъасса хьурча, цува мустахIикь шайсса,
Гьарица оькьубалун аьмалданух урувгсса.
Фазлулийн лайкьмари тIий, дакIнийн нажагь багьарча,
Иътисафрал гьаннари, ина къаттихIинтIисса.
Кьуйлчинмур – чIяву давур дакI ччурччуну хьу хашьят,
Аллагьнал макрулия кIул бакъа фужъат шайсса.
Му ца хафийсса кьагьрур, Заннал буруччин баннав.
Муния ами́н хьума ахирданий угьайсса.
Кьуния цалучинмур махIаббат цIакьну давур,
Цала муршид ччишиврий дакIнил ихлас архIалсса.
Муршид камилну чIалай, хъинну са́бикьну чIалай,
Цала щала сааьдат муная иътикьа́драй.
Шайхналма шайхнияргу цалама хъунну чIалай,
Мунал кьамулну хьума кIанал аврингу хьулдай.
Шайхнал цува радд аву – шайхнал шайхналгу авур,
ИдавсичIан дияннин силси́ла дачин дуллай.
Му иътикьад аьркинни муриднал муршиднайсса,
Ца назратрал вусу́л ай уругарча хIакъирай.
ХIакьсса назар диярча цувагу ияншиврий
Аллагьнайн вусу́л хьусса аьрифтурал макьамрайн.
Тафриду-ш-шайх ва́жибссар, му махIаббатрал бакIри,
Мукун къаккавк шайхная мурадгу хIасул къашай.
Амма ва байсса калам муршидун камилнанни,
Тасарруфран агьлусса истикьа́мат думиннай.
Шайхшиврий дяъви буллай щяйтIанну заназима
ХIарамсса насабрайну, арх уцу – фаса́д увай.
Камилгу, акъамагу личIи ангу захIматри,
Агьлул-баси́ратътурал цал назардалун кIул бай.
Вай жунма ххал шай шайхтал жухава лавхьхьусса бур,
Баси́рат цIансса жунма марцIма ххал шайссаривкьай.
Уттирив бигьану бур шайхшиву дачин дуллан,
Нисбат-санад дакъари, хIарачат бур шайх хъанай.
Ми шайхтуран лавхьхьусса мури́дталгу чIявури,
ЦIухху-бусу бакъари, муридра чирча гьа шай.
ЛатIи́фартту ци кIулли, талкьин къавхьу жагьилнан,
Насаб ци са́бит данссар, ппу акъасса мавлу́днай.
Таназзул таракъи́рив ссайн чайссарив ци кIулли,
Ссайгъат гьарзану лавсма маъзунни тIий ккаккан ай.
Заманалул ахир дур, ххуйма кьамул къаайсса,
Жува даин буваннав хъинминнал баракатрай.
Вила адаб дуручча, чил аьйиб цурда дити,
Муршидун ка́мил ххал а́, рухIрацIа хьуннин занай.
Мунал адаб дуручча, увкумур цIакьну бугьи,
Тасаннуъ мадулларда, таракъи́лин тамахIрай.
Вила ахIваллу буси, оьккимургу кьюлтIмургу,
МакI личIа маучара, ккавкмур буси адабрай.
Гъа́яту-тазарруърай тазаллулну алуцIу,
Мунал хьхьичIун лагайни аьмалдал мукьтаза́рай.
Кьара́инну ххал дурну, шайхнан къаччисса чIумал
Лу-ялунгу къагьанссар, икIанссар хIузу́р хIаллай.
ХIалгу за́гьир къабанссар муршид акъа цаманан,
Му гъайбатсса чIумалгу архIал а́ча хIузурдай.
Къумания гьартанин уккан ан вин далилли,
Ила́гьий фазлулийну эна́ятрайн кIункIу ай.
КутIасса калам мури, каламрал ххуймур вари,
Адабрай да́имшивур, агьлуЛлагьрал оьрфатрай.
Адабрай къаацIарча, макьамрал мукьтазалий,
Су́ул адабну хьуну, му лагайссар мала́мрай.
Амма вайннан машрабру личIи-личIисса буссар,
Миннал саъю наниссар асхIабтурал акьда́мрай.
Аьдадул анфа́сирттай тIара́икьру укунма,
Маша́рибругу буссар му куццуй тафа́вутрай.
Утти жува чIа тIимур аьфву ва аь́фиятри,
КIивагу къатлувусса да́имсса сааь́датрай.
Миннал барачатрая махIрум къабаннав жува,
Ляхъан бувсса щугълулий бацIан баннав тавфи́кьрай.
Амин!
