“ЦIувкIратусса МахIаммадлул на ххассал увунна”
“ЦIувкIратусса МахIаммадлул на ххассал увунна”
Ттун 84 шинни. ДукIу гъинттул на оьну къашавай хьунав коронавирус дирну. Гьутрурдан хъунмасса зарал бивну бия. На утту ишин увунав МахIачкъалаливсса Ветерантурал азарханалий.
Га чIумал азархана къашайшалтрал бувцIуну бия. Гьарца кьини цIу-цIусса къашайшалт бувцуну бучIайва, ливтIуссагу чансса бакъая. Духтуртурал цуксса хIарачат булларчагу, циняв ххассал буван бюхълай бакъая. Макрузансса азарданул ва ганил дутлатисса нигьирал тамансса халкь жандалуцIа буллай бия. Ттул пикрилий ца-цавай инсантал хъин шавринсса умуд кьувкусса даражалийн бияврилгу литIун буллай бухьунссия. Ттулмур тагьаргу ххуйсса дакъая. Духтуртал бия ина хъин хьунтIиссара тIий, амма хъанахъимур чIалай, хIакинтурал тIимунийн вихшала кьуркьуну, азарханалува сагъ-саламатну уккансса умуд къаливчуна.
БакIравусса пашмансса пикрирдал дукралух тамахI къаливчIуна, сукку хьунвагу ччай бакъая. Му захIматсса лахIзалуву Аллагьнал I на ххассал уван гьан увсса куна, ттун бакIрайн агьуна 1-мур ЦIувкIратусса ХIусманов МахIаммад. Му ттущал ца палаталуву утту ивхьуну ия. Ттул ахIвал ххал хьувкун, МахIаммад ттун кумаг буллай улувкьуна. ЧIивисса оьрчI куна низамрай къусува дукра канаки уллай, цана маччасса инсаннах куна урувгуна, аяька дуруна.
Мунияр махъ на чан-чанну тIий хъин хъанан ивкIра. Аллагьнал цIимилийну, МахIаммадлул аякьалийну ва духтуртурал хIарачатрайну кьадарсса азарданул ххяппурттаща личин бювхъуна. ДакI дарцIуну ура, МахIаммадлул кумаг къабувссания, на та азарханалува тIайлана хIатталив уцинссияв тIий. ХIусманов МахIаммадлул цала узданшиву, инсаншиву ва дакIнивусса иман ккаккан дуруна. Азарханалий ттуй дурсса аякьа къагьану, кIира нюжмарданува ттух урган ттучIан шавай Щамхал-Терменнайнгу увкIуна.
МахIаммад зий ивкIун ур МахIачкъалалив милицанал органнайгу, таможнялийгу. Ва таможнялул къуллугърал майор ур, цIана зий акъар. Ванал 92 шинавусса нину ковидрал къашай шайхту, вагу МахIаммадлул ччаннай дацIан дуршиврий дакI дарцIуну ура. Ятсса ттуха лахъан къахьунсса хIурмат бувсса, аьзизсса ниттиха цукун лавай авцIуну, аякьалий ухьунссия. На ванан цанмагу, ванал кулпатран, мукьвагу оьрчIан, душнил наслулун, ниттин цIуллушиву оьрмулуву барачатшиву, талихIтирханну ва тIайлабацIу чIа тIий ура.
ШАМИЛ ИДАЧЕВ
Щамхал-Термен
