Лайкьсса хасиятру
ДухIин душиву – му хIайванийсса сипатирттая ва шагьватирттая нафс ва чурх арх буцан бавури. Мукунсса сипат дусса инсан АллагьначIансса ﷻ гъаншиврул ва кьянкьашиврул (цIакьшиврул) заллуну хъанахъиссар.
КIукIлушиву – шагьват бакъанмасса рахIму-цIими бишаву ва язугъшивури. Укунсса сипат дусса инсан халкь тарбия буван, насихIат бусан бюхъайсса шайссар.
Иминшиву – цайминнаяр цува лавайшиврийн тамахI къабишавури. Халкьуннащал хIурматрай, адаврай икIавури. Укунсса хасият дусса инсан барачатрал заллуну икIайссар, мунал аьмаллугу Аллагьнал ﷻ кьамул бувайссар.
ДакI тIиртIушиву – цанма ххирасса инсантуращал хьуна авкьуний ххаришиву ва пиш тIутIаву ялун личин давури. Укунсса хасият дусса инсан тIайлабацIу бусса, талихI бусса хьунтIиссар.
Пикрирдал марцIшиву – Заннал ляхъан дурмуния пикрирду марцIсса бикIавур, миннух рязину уруглагавур. Укунсса хасият дусса инсанная марцIсса, дакI тIиртIусса инсан шайссар.
Сахаватшиву – цанна цичIав тIалав къадуллай, цукунчIавсса мурад хьхьичI къабивхьуну, хъус бусравсса инсантуран харж дувавур. Укунсса хасият дусса инсан ниятирттаву марцIсса, дакI тIайласса, лахъсса даражарттайнгу гьаз хъанахъисса хьунтIиссар.
Сивсушиву – шариаьтрал дазурдава къауклай, захIматшивурттайн ва бала-мусибатирттайн нанаву. Укунсса хасият дусса инсан цIакьсса ва хIурмат бусса икIантIиссар.
Ссавур даву – ва дунияллий ва Ахиратраву Аллагьнал ﷻ рязишиву ласуншиврул баларду ва захIматшивуртту духIаву. Укунсса хасият дусса инсаннал Аллагьнаяту ﷻ муданма кумаг-кабакьаву ласлантIиссар.
Къайгъу баву – АллагьначIан ﷻ иян хIарачат баву ва гьарца задрая махъунай шаву. Укунсса хасият дусса инсан АллагьначIан ﷻ ивминнавасса, гъан хьуминнавасса икIантIиссар.
ХIарачат бушиву – инсаннал цала бакIрайн ларсъсса зад паракьатсса дакIнищал биттур даву. Укунсса хасият дусса инсан неъмат цан буллусса инсантуравасса хьунтIиссар.
КьюлтIмур ялун личин къабаву – винма аманат бувмур ашкара къабаву. Укунсса хасият дусса инсан сахаватшиврул ва хIурматрал майданнайн гъан хьуманугу, элмулул ва хIикматрал заллунугу хьунтIиссар.
Чанссаннуй рязи шаву – Аллагьнал ﷻ дуллумунийну дакI паракьат даву, чIяру дуван хIарачат къабуллай. Укунсса хасият дусса инсан хъинсса дакIнил заллунугу, бюхттулсса инсаннугу икIантIиссар.
Дуниял къаххирашиву (аскетшиву) – Заннаха эбадат дуван диял хъанахъисса дазурдал кьатIув дуклакисса дунияллул хъуслия махъунай шаву. Укунсса хасият цаву дусса инсан Аллагьнан ﷻ ххираманугу, инсантуран пайда буманугу икIантIиссар.
Таваккул бутаву – Аллагьнал ﷻ сахаватшиврийн таваккул бивхьуну, мюхтаж хъанахъимуниву къайгъу баву дакъашиву. Укунсса хасият дусса инсан Аллагь ﷻ кIул шаврил заллуну икIантIиссар.
Вай кIицI ларгсса ххуй дакъасса хасиятругу цаватура дукьан дурну, вай цинярдагу ххуйсса хасиятру цачIун дурсса инсаннан, вай цинярдагу камилсса сипатру хIасул хьунтIиссар. Махлукьатрал сайид МухIаммад Идавсил ﷺ суннатрал хъирив авчуманугу хьунтIиссар. АллагьначIан ﷻ бивсса, хIурмат бусса хъунисса валийтуравасса ва ххираминнаватусса икIантIиссар. Циняв макьамру цавура цачIун дурминнавасса, ахIваллу хIасул хьуминнавасса, чувшиврул даражалийн гьаз хьуминнавасса икIантIиссар.
