Бархъаллал Маллайл шеъри

"Мажму́аьтул-аьша́р" тIисса луттирава. Бишлашиссар луттираву бусса куццуй.

(Дайдихьу хьхьичIмур номерданий)

Ружмарданул чак бувну камилну кьаст дуруна,

Цалва-цалва агьлулухь хIалал бити увкуна.

Къумамий тархъан бувну душманмий дакьил бувну,

Цайва-цайва ялувсса хIакьру тIайла бувккуна.

ДакI къума хьунсса куццуй хъинну бикIи увкуну,

Аьишатлул ичIату ХIабиб кьатIув увккуна.

Гьари ккавксса инсаннан дакI аьраххансса куццуй

Цала чIарасса кьюкьлухь кьюкьри дахIин дуруна.

УхIудрайн урувгуна, хIарбулийн хIадур хьуна,

ДакI лухIисса душмантал кутак дуну лявкъуна.

Ряхттуршагу гъазийнал низам дуллан бивкIуна,

Ссавнийсса малаиктал агьи тIий бурувгуна.

Алжандул хIурулъэнтал ссавнийн бувккуну бавцIун,

Тура́щал бувксса вирттал цукун литIайрив ккаккан.

Жаннатул-барзахирал цинявппа хIурулъэнтал

ХIабибнал талатаврий тамашалий бавтIуна.

КIивайвагу аьскарду цандичIан ца гъан хьувкун,

Аьрабнал лухIи тур́ал лухIи дурна дуниял.

КIиазара мушрикнал хьхьичI авчур Абу-Суфьян,

КIиттурша бурттигьунал бакIчи хьури Аькрамат.

ОьрчIру цанал ябайсса Заннал гъалбарцI укуна

ЧIарасса кьюкьлул лагма уклан ивкIуна ХIабиб.

Кьюкьлувату бувчIуну ца ххюцIала виричу

Аьбдуллагь ялув ивтун, ялун бачин бувуна.

Заккунттул чув ивчIайни, чIатIаракI тIайла дайни,

Махъа аьрал ябуван барцIру кунма бавцIуна.

Яла Заннал ХIабибнал хьуйлува тур дурккуна,

ХIакъирайну ласунма буккияра увкуна.

Абу Дужанат увккун, хъап увкун тур ларсуна,

ХIакь цирикьай увкуну, «Я МухIаммад» увкуна.

Талатаврил хIал кулсса, виричув цув камилсса,

Абу Дужанат гъалбарцI тургу ларсун авчуна.

Идавс цай рязи хьуна, турлил кьимат бувсуна,

Гъюжу дукканнин рища, ахир кьинири куна.

ЯтIулсса чалмалущал, дурккун канил турлищал,

Абу Дужанат гъабларцI щукь тIий хьхьичIун увккуна.

Хъилий кьяпа бивхьуну, мазрал балай увкуну,

Гявурнал хьхьичI авцIуну зума цIухлан ивкIуна.

Идавсил урчIамур хъачI на зун къакIулдив куну,

Заннал цIагу кIицI ларгун гъалбарцI хIала увххуна.

КIинналвагу аьскарду цаннивун ца бувххукун,

Оьттул бярду бавцIуна, аьрал бярав багьуна.

Чапурнал аьралундал нигь бакIравун дурххуна,

Суфьяннул гьалмахтурал лихълан кьасру дуруна.

Аьрал ябан бавцIусса махъа кьюкьа ххярххуна,

Махъа нигь дакъасса ххай, хъяврин хьуну ливчIуна.

Аькраматлул бурттигьалт ялун гьужум бувукун,

Идавсил аьралундан зарал хъанан бивкIуна.

Идавс ивкIунди куну Жиа́ьлдул вев увкукун,

ХIабибнал аьралундай кьияма кьини хьуна.

ДакIру паналун хьуна, бала ялув ливккуна,

Идавсил аьралуннал лиллан кьасру дуруна.

Микку архIал бувцусса чапурнал курчIу хъандил

Ччергъилттухун балай тIий чапурнал дакI дуруна.

Абадлийсса къатлуву сааьдат хIасул хьумий

АрулцIала гъазийнал Алжан яла бувчIуна.

Аллагьнал ций хъун бувну шагьадат нясив хьумий

МухIаммадлул гьалмахтал Алжандавун бавчуна.

Ца дарцIусса ттарцI куна Султан цувалу ливчIун.

Абубакар ва Оьмар, Аьливагу къаккавкри.

Яла лухIи душмантал ХIабибнан гьужум хьуну,

Чарттал ивчIан кьас дурну, лагма бишлан бивкIуна.

КIивагу къатлувусса лажин лухIи душмантал

Оьтбатлул бивщу чару Мухтарнал ккарччай щуна.

ХьхьичIсса ккарччи гъаргъуна, мурччайн щавурду хьуна,

ЦIузурун лархьхьу симан оьттубун дахьларгуна.

Аллагьнал хIикматирттал ХIабиб къума лавгуна,

Кьурайшитурал аьрал циняв ялун бавкьуна.

Му хIал Идавсий буна, цувалу ливчIун уна,

Зияд ялун ивуна ансартурал ххюннащал.

ХIабибнал лагма багьну ххюягу шагьид хьуна,

Идавсийн буцур хьусса Зиядгу щяв агьуна.

ТтучIанай хьу увкуну ХIабиб кIура авуна,

Идавсил ччандайн ппай тIий Зиядлул жан дуллуна.

ДахIалай шугьадаътал ХIабиб аьтIий ливтIусса,

ХIурулъэн хьулийн бувкIун Алжандавун бувцусса.

Абу Дужанат ххявххун, Идавсин буцур хьуна,

Идавсийн нанирици цайнда щилащи дуна.

Цаннил ялун ца щилай щавурду гьарза хьуна,

Абу Дужанат гъалбарцI хIалдалия лавгуна.

Ансартурал виричу Сяъду луглан ивкIуна,

Идавс дакIний кьувтIуну аьралду куччу буллай.

Шагьадат тIалав дурну, ТIагьанайн эшкьи дурну,

Оьрму къачча ттун куну, Сяъду хIала увххуна.

Аллагьнал фазлу ливккун ХIабиб чIалан ивкIуна,

Турлил къия дуруна, ИдавсийчIан ххявххуна.

Оьттул лажин дурцIуну, гьалмахталгу ливтIуну,

АсхIабтал личIий хьуну, ялгъуз хьуну лявкъуна.

Сяъдуй куну оьвкуну чIарав ацIан увуна,

Ттининту чув уссияв, янин къаккавксса куна.

ХьхьичIун укку увкуна, бюхъаймур ба увкуна,

Кьавс кIункIу ба увкуну, гъира бизан бувуна.

Сяъдулсса къуртал хьуна, цалда чIатIаракI ритлай,

Щалба чапурнал аьрал махъунбай байщун бувна.

Аьсимлул хъит увкуну, ккуртту кIункIу бувукун.

Ккуртлул ххал дурцун асхIаб махъунай палцI увуна.

Аьрабнаву цIа дурксса Кьатадат тIисса асхIаб,

ЧIатIаракIрал я бувкри, бувккушив кIул къабуври.

Яла ХIабиб урувгун, чIюнпи дургъун ка щури,

БивкIсса куццуй хъин хьури, чани зияда хьури.

Султаннал ттугъ бувгьури Мусъэб тIисса гъалбурцIил,

Расулнал хьхьичI авцIуну, цува ивчIаннин иври.

ХIабибнал ттугъчи гъалбарцI Мусъэбгу шагьид хьури,

Цахлуну рухI дарххури, УхIуд зунттуй увччури.

БакI чухълуву бивхьуну, ччаннайн чIахIа бивчуну,

Пакьрулий гьав нясив хьур Мусъэб чайсса сайиднан.

Шугьадаътурал Сайид, АьбдулмутIтIаллиблул арс

Идавсил буттауссу, ХIамзатгу шагьид хьури.

(гихунмайгу буссар)