Талкьин

Талкьин

Муъминсса диндалул уссу
Дуньял кьадиртсса Заннал лагъ,
Бувккусса гьантри бухлавгун
Кьадарданийн ивсса пулан.

Фаризасса бивкIу бувкIун,
Гьаттаву ина увччунна,
Гьаттавусса хIисаб-суал
Утти вин мигу хIакь хьунни.

Тти вил ялун бучIанссари
Аллагьнал I кIива малаик,
Мункар ва Накир увкуну
КIиннаннагу цIарду дусса.

Вин пайда бан къабюхъайсса,
Зарал биян бан къашайсса,
Аллагьнал амру бувмунийн
МютIи хьуну заназисса.

Тти вихь миннал цIуххинссари
Вил Зал, Идавс цури, куну,
Ци диндалий ивкIра куну
ХитIаб дурну гъалгъа банссар.

Яла ина жаваб дула
Нач къавхьун, нигьа къаувсун,
Заннал малаиктурахьхьун
ХIал баххана хьун къабивтун.

Цинявппа халкь ляхъан бувма
Халкьуннан ризкьи булайма,
Уттавами литIун байма
Аллагьри ттул Заллу, куну.

Дин кIул дуван цув гьан увсса,
ВахIъю цачIан тIайла бувсса
Кьурайш тухумдалиясса
МухIаммадри  Идавс, куну.

Ислам ттул динди увкуну,
На муний ивкIура, куну,
Шагьадатгу дучIан дурну
Гъалгъа ба Мункар-Накирнахь.

Имамгу Кьуръанди уча,
Кьиблагу Кяъбари уча,
Чак ва зума, закат ва хIаж
Жуйвасса фарзрури уча.

Муъминтал ттул уссурвалли,
Муъминатъхул ттул ссурвалли.
Аллагьнал экьи ливчусса
ЩяйтIангу душманни уча.

Кьияма кьини дучIаву
Щак бакъасса хIакьшивури,
СиратI, Мизан тIайлассари,
Алжан ва Дуржагь хIакьссари.

Ва куццуй жаваб дулурча,
Алжан вин хIадур бувссари.
Жаваб дулун къабюхъарча,
ХIисаб-суал цIакь хьунссари.

ТIайлану жаваб дулунсса
Тавпикь Заннал вин дулуннав,
Цанма ххира лагътал кунма
Ина тIайла ацIан аннав.

Хъинну хIакьсса гъалгъа буван
Аллагьнал тIайла уваннав,
Цинявппагу вай муъминтал
ТIайла бацIан бувсса куццуй.

Тти вин Заннал ссалам хьуннав
Вил чIаххутурайнгу хьунав,
Имандалий рухIру дурксса
Муъминтурайнайнгу хьуннав.

Аллагьнал кьадарданийну
Зу хьхьичIун бувккун бунугу,
ХIакьну хIадурссару жугу
Му зул ххуллийх хъирив бучIан.

Аьрщарая ляхъан бувну,
КIилчингу аьрщи хьун бувну,
Ахирданий бизавугу
Аьрщарая хъанай бури.

Дунияллийсса гьарца зад
Пана шаву хъинну хIакьри,
ХIакьсса жула Зал акъама
Махъ личIайсса зад дакъари.

Инна лиЛлагьи, Аллагьнан
Лагъшиву дан ляхъан бувру,
Махъва-махъгу АллагьначIан
Цинявппа зана шайссару.