Шагьид дакIнин утлай…
Шагьид дакIнин утлай…
Дагъусттаннай, хаснува лакрал миллатраву мудангу бивкIссар ххаллилсса, уздансса, виричусса инсантал. ТIайласса махъ учин хIучI бакъасса, ватандалун ва халкьуннан мюнпат буван гъира бусса лаккучу ия ШавкIратусса Аьлишаев Аьбдуллагьгу. Га ия жула заманнавусса цалчинма бусурманнал журналист, телевидениялий Исламрая буслай айивхьума. Тамашачитуран так мяълумсса, балжисса бакъа хавар баян къабайва.
2008-ку шинал сентябрьданул 3-нний Аьбдуллагь цала машиналий шавай наниххуллий бивтун увтун, шагьидну дунияллия лавгссар. Аьбдуллагьлул хъуннасса даву дурссар жула республикалул жяматраву Исламрал кьанунну цIакь дуваншиврул, къадурну лирчIмигу чансса дакъассар.
Кьуръандалуву бур укунсса мяъна дусса махъру: «Аллагьнал ﷺ ххуллий дунияллия лавгми ливтIумину ккалли мабувари. ХIакьну, гай уттавассар, буссар ЗанначIа цанмасса кьисмат ласлай» («Алу Эмран» тIисса суралул 169-мур аят).
Уттигъанну шагьиднал буттал шяраву хьунни Аьбдуллагь дакIнин утлатисса батIаву. Шикку цачIун хьуну бия ганал мачча-гъанми, дустал, даврил уртакьтал, шяраваллил жямат.
Мажлис сакин баврил сиптачину ия ШавкIуллал имам Насрудин ОьмархIажиев, шяраваллил администрациялул бакIчи Камил Джалаевлул кабакьаврийну.
Укунсса мажлисирттал аьдатрайн бувну, байбишаву дуруна мубараксса Кьуръандалул аятру буккаврия. Ккалаккиману ия Хъанардал шяраватусса МухIаммад-ХIабиб Къандалаев.
Цалчин махъ буллуна Аьбдуллагьлул уссихьхьун Аьлишаев АхIмадлухьхьун. Ванал бавтIминнахь барчаллагьгу увкуну, микрофон буллуна уссищал гъанну дусшиву дуллай ивкIсса цала ссурахъихьхьун Аьлишаев Заурдухьхьун. Ванал бувсуна Аьбдуллагьлул чIивинийва Кьуръан буккин лавхьхьуну бивкIшиву, ссаха зурчагу, цанна дакъакьайсса санят кунна чIалай, мудан ссахарив луглай ивкIшиву, ахиргу диндалулмур ххуллу бувгьушиву.
Хъирив лакку мазрай хъинну дюхханну мавлудру дурккуна МухIаммад-ХIабиб Къандалаевлул ва Кьубиял имам Исмяил Аьлибаговлул.
Лакрал райондалийсса «Инсан» фондрал каялувчи ХIажимурадов Шихмурадлул бувсуна цува Кьубав имамну зузисса чIумал Лакку билаятрай Аьбдуллагьлущал цачIу дуллай бивкIсса давурттая. «Жула уссу Аьбдуллагь Аьлишаев ия цала миллатрай хъинну дакI цIуцIисса инсан. Га ия ххишала акъа аькьлулул увччусса, диндалуву бумур щаллу буван хIарачат бусса, мяйжансса бусурманчу. Ганал хIадур дурсса кинордал, передачардал чIявусса халкь тIайласса ххуллийх бачин бувну ххассал бувссар, Аллагьнал ﷻ чичрулийну. Гайннул агьамшиву хIакьинугу хъуннассар. ХIакьинугу буссар ганал даву дачин дурну наними».
Шагьиднал ссурахъу Айгунов РахIманнул дакIнин бувтуна Аьбдуллагь гьарца чулуха итххявхсса ивкIшиву: «Ванан Аллагьнал ﷻ хъунисса пагьмурду буллуну бия. Ванаща цимивагу институт буккингу хьунссия, лакъархьхьусса санятгу дакъая: лехху хъанайгу уссия, ккарччал духтургу хьуссар, усру дуллайгу мадарасса хIал бувссар. Ахиргу Исламрал даврихун агьуна. Журналистшиву дуллай Аьбдуллагьлул личIину ляркъусса хъусгу дакъар. Ваная махъ лирчIмур дур хIадур дурсса передачарду, чирчусса макьалартту, амма ттуща гай ххал дуллан къашай пашман хъанай. Укун жагьилсса оьрмулувусса бивкIу щинчIав нясив къабаннав, дард къаккакканнав!»
Хъирив махъ лавхъсса Лак-рал райондалул имам Баталов ХIабиблул бувсуна Аьбдуллагь Аьлишаевлул кьадиртсса передачарду ххал дурну тIайла бавцIуминнахсса чири ганайн цайнмагу хIакьинусса кьинигу биллай бушиву.
Муфтиятрал просвещениялул отделданул Лакрал райондалийсса зузала Муъмин Насрудиновлул оьвчаву дуруна Аьбдуллагь Аьлишаевлул бувгьуну най ивкIсса ххуллийх бачин, Исламрал давуртту хьхьичIуннай дуллалиминнал чIарав бацIан, диндалул иширттахун бахкъачилан.
ШавкIуллал администрациялул бакIчи Джалаев Камиллул цала чулуха баян бувуна шяраву Аьлишаевхъал къатри дусса кIичIираваллин Аьбдуллагьлул цIа дизансса пикри бушиву. Клубравун бавтIсса жяматгу бакIчинащал рязи хьуна. Аьлишаев АхIмадлул барчаллагь увкуна уссил аьпа уттава бувансса даву дуван дакIний бушиврийн. КIицI лавгуна, ШавкIуллал шярава кIичIирттан цIарду дизан лайкьсса цаймигу хьхьичIунсса инсантал бувкшиву.
Аьбдуллагьлул хьхьичIунсса дус ва даврил уртакь МухIаммад Мажидовлул дакIнин дивчуна цала цачуну дуллай бивкIсса давуртту, Лакку биялаятрайн бувсса аьрххи-ссапарду, бувсуна га ляличIисса инсан ивкIшиву.
Ваччиял шяраваллил имам Кьурбан-МухIаммад МухIамма-довлул бувсуна Аьбдуллагь ивкIшиву цала оьрмулул мяйжансса мурад кIулну, га мурадрайн нанисса инсан. «Иминсса, кIукIлусса инсан унугу, аьркинсса чIумал чарияр кьянкьа шайва. Цала мурадрайн иявривугу кьянкьашиву дусса ия. Жула учай «ахир хайр даннав!» куну. Лахъисса оьрму къабувтнугу, чIярусса хъус къаляркъунугу, талихI бусса инсан ия», - увкуна имамнал.
Хъирив махъ лавхъуна ШавкIулал имам ОьмархIажиев Насрудиннул. Ванал Заннайн щукругу бувну, мажлисрайн цачIун хьусса хъамаллурахь барчаллагь увкуна. Имамнал барчаллагьрал чагъарду буллуна шяраваллил администрациялул бакIчи Джалаев Камиллун ва диндалул иширттаву чялишну чIарав бацIаву дувайсса Аьлишаев АхIмадлун, Маммаев Русланнун ва Тумалаев Давудлун.
