Миллат цачIун бувсса мажлис
Миллат цачIун бувсса мажлис
Октябрьданул 4-нний, МахIачкъалалул зуманив цIуну буллалисса Ися Идавсил цIанийсса рувхIаний центрданийн, МухIаммад Идавсил ﷺ мизитравун, лакрал мажлис-мавлудрайн бавтIун бия шаназарунниха ливчусса лак.
БавтIун бия Аллагьнал гьан увсса махъа-махъма Идавс ﷺ увсса ххаришиву кIицI лаган, жувагу Мунал ккаккан бувсса ххуллийх най бушиву чIалачIи буван. Мажлис байбишиннин бавтIцири бия исвагьину чIюлу бувну хIадур бувсса кIанай суратру ришлай, мизитравух экскурсия буллай. ЧIявуя Мариян Илиясовал цIанийсса «Дараччи» фондрал экспозициялий тамаша буллалимигу. Ва давугу дурну дия Республикалул Халкьуннал творчествалул къатлул директорнал хъиривмур Гульнара Мюрщиевал, хьхьичIазаманнул тIахIни-кIичIу, муму-тамур, цуппа заллусса коллекция ккаккиялун бивхьуну.
Мажлис байбивхьуна караматсса чIунил ва такьвалул заллу, Стамбуллай дурккусса, Ххутрал шяравасса хIафиз МухIаммад-Наби Буттаевлул Кьуръандалул аятру буккаврия.
Дагъусттаннал Муфтийнал цIанияту агьали барча буллай, Муфтийнал хъиривчу, Исламрал элмурдал доктор МухIаммад МахIаммадовлул кIицI лавгуна республикалий нахIушиву, дакьаву дуруччавриву бикIу, рувхIаний культура хьхьичIуннай дувавриву бикIу, Муфтиятрал хъунмасса бияла бушиву ва му давриву хасну лакралмур бутIагу хъунмасса бушиву.
Вава мяъна-мурадрайсса бия Дагъусттаннал Муфтиятрал просвещениялул отделданул каялувчи Идрис Асадуллаевлул ихтилатгу.
Исламгу, ниттил мазгу хьхьичIунну бикIан аьркиншиврия, буттал кIанттух ччаву дуну яхъанан аьркиншиврия бия Ккуллал райондалул имамтурал советрал председатель МухIаммад-Маннар Бариевлул, Чараваллал шяраваллил имам Камил Маммаевлул ихтилатру.
Дагъусттаннал экономикалул ва территориал развитиялул министр ХIажи Султановлул бувсуна цанма асар хьушиву, Лаккуй Ислам машгьур дуллай зузисса, табасараннал миллатрал вакил, Шихмурад ХIажимурадовлул марцIну лакку мазрай ихтилат бувавугу, лакку мазрайсса мавлуд дуккавугу.
Ислам лахьхьавриву, Исламрал ххуллий оьрму бутавриву барачатшиву лякъинтIишиврия, агьалинан ялу-ялун диндалул агьамшиву дурчIлай душиврия, жагьилтурангу, дуклаки оьрчIангу тIайласса ххуллу цумурдив бувчIин буллан аьркиншиврия бия Кьиблалул территориал округрал просвещениялул отделданул каялувчи МухIаммад Майрановлул ихтилат.
Исламрал кIулшивуртту ласласисса мутааьлимтурал бувсуна цала дуккаврия. Шиккува кIицI лаганна, Исламрал кIулшивуртту ласун ччинан хIадур дурну дия ххуйсса видеосурат. Мукунна ххуйсса видеосурат дия Дагъусттаннал Муфтийнал, щайх АхIмад-хIажинал оьрмулул лахIзардая бусласисса. Дия лакрал бюхттулсса тарихраясса видеосуратгу.
Авадансса программа ягин дуруна айфоннал ва чIивимур хIажлийнсса путевкардал (шанна айфон ва вайкссара путевкарду) заллухъру хьунсса тIайлабацIу хьуминнал ххаришиврул. Оьмралийнсса кIира путевка кIунурду къабувккунува дуллуна арилчинмур курсирайн бияннин дурккусса мутааьлимтуран. Вайннахьхьун путевкардал сертификатру дуллуна ЦIуссалакрал райондалул имам Мансур Хаваевлул.
Дия ххуйсса гьанттайнссаннул урцIи. Шикку кIицI къалавгун битан къахьунссар, лахъсса даражалий мавлуд тIайла дукканшиврул, хъунмасса захIмат бивхьушиву Сакиншиннарал комитетрал члентурал, хаснува лакрал имамтурал, волонтёртурал, дукралуха зий бивкIминнал. Шаназара инсаннансса урцIилул даву сантирай ва низамрай дуван къабигьассар, амма лакралмур мавлудраха зузиминнал ва даву цIа данну дунни, мажлис къуртал хьуну махъгу гьарзат ларкьуну, пар-партIи дурну. Гьаннайсса, мавлудрайн бувкIцириннал итталун къадагьсса давурттугу, къайгъурдугу мудангу чIявуссар.
Умудрай буру, жулва авадансса тарих бусса миллатрал цашиву ккаккан дурсса, лакрал куннал куннахсса ччаву хъиннура цIакь дувансса мажлисрал барачат щалвагу миллатрайн биянтIишиврийн.
ПатIимат Рамазанова
