Конкурсрал хIасиллу
Конкурсрал хIасиллу
Сентябрьданул 17-нний Ваччиял шяраву хьунни хъунмасса мажлис. Шикку баян бувуна МухIаммад Идавсил ﷺ оьрмулиясса луттирайну бувсса конкурсраву ххув хьуминнал цIарду.
Мажлис хъун буван бувкIминнал Культуралул къатри дуцIин дурну дия. БувкIминнавух бия Дагъусттаннал Муфтийнал хъиривчу АхIмад МухIаммадов, Ккуллал райондалул бакIчи Шамил Рамазанов, Лакрал райондалул имамтурал хъунама МухIаммад Саламов, Ккуллал райондалул имам МухIаммад-Маннар Бариев, Гъази-Гъумучиял имам Ансар Сулайманов, ЦIуссалакрал райондалул (Новостройрал) имам Мансур Хаваев, Дарбантуллал мизитрал имам МухIаммад Майранов ва Ккуллал, Лакрал ва ЦIуссалакрал районнайсса шяраваллал имамтал.
чIуний бюхханну Кьуръандалул аятру буккаврия. Ванал кIицI лавгуна, МухIаммад Идавсил ﷺ оьрмулул тарих хъинну мюрш бивкIун, хъирив лавну кIул бувну бушиву, цанчирча, хIадисру (Идавсия ﷺ бусласимур) цачIун буллай бивкIсса аьлимтурал хъинну хъуннасса къулагъас дувайсса диркIсса бусласима ци хасиятрал, цукунсса инсан ивкIун урив, вихшала дишин бучIисса урив ххал увну: «Пикри бувара, тай хIадисирттал луттирду сакин буллалиминнал хIадис къаласайсса бивкIссар оьрмулуву цалвагу щялмахъ бувсъсса ягу бунагьру буллай хIисав хьусса инсанная. Мукун мюхчанну тарих сакин баву Исламраву бакъа цамур кIанттаву бакъассар».
Мажлис тIивтIукун цалчин махъ буллуна Муфтийнал хъиривчу, Исламрал элмурдал доктор АхIмад МухIаммадовлухьхьун. Ванал щалагу лакрал жяматрахь Муфтийная ссаламгу бувсун, дакIнин бувтуна МухIаммад Идавсил ﷺ оьрму кIул баврил агьамшивруя: «Идавсил ﷺ оьрму, ганал хасият кIулманал дакIниву ганахсса ччаву, Исламрал ххуллу бугьансса гъира ххи шайссар, мунияту, ва конкурсраву гьуртту хьуминнаву цавагу ух хьусса акъассар. Бахшишру къадурххуманал багьа бищун къашайсса элму ларсъссар. Му элмулия мюнпат хьунтIиссар дунияллийгу, ахиратравугу», – увкуна аьлимчунал.
Ккуллал райондалул бакIчи Шамил Рамазановлул Муфтиятрал зузалтран, хаснува лакрал шяраваллаву зузисса имамтуран барчаллагь баян бувуна. Бувсуна Муфтиятрал ва райондалул идарарттал цачIуну дуллалисса мюнпатсса давуртту чIяру хъанай душиву, райондалул жямат диндалул чулухунмай кIункIу тIий бушиву. «Инсаннан неъмат, рахIатшиву ттун чIалай дур диндалул тIалавшиннарду биттур давриву ва жула миллатрал аьдатру дуручлай бачавриву. Мунияту вай имамтурал дуллалисса давурттан лайкьсса кьимат бищун, чIарав бацIан аьркинссар», – увкуна Шамил Рустамовичлул.
Дарбантливсса щейх МухIаммад Ярагъил цIанийсса мизитрал имам МухIаммад Майрановлул дакIнин бувтуна инсаннал дакIнин дигьалагру, барачатшиву так диндалуву лякъин бюхъантIишиву ва миннух цамуниву лугларча, инсан аьйкьусса ххуллийх гьан бюхъайшиву: «Аллагьнал ﷻ жуйва ялув бивхьумуниву жунма мюнпат буссар. Жура дуллалисса эбадатрая Аллагьнан ﷻ цукунчIавсса хайр бакъассар, ва жулва бунагьирттая Заннан зарал къашайссар. Аллагьнал ﷻ ххуллийх къананима – щяйтIаннул ххуллийх нанимари. ХIадисраву увкуну буссар: «Аллагьнан ﷻ ччан бикIарча ца инсаннал ляличIисса неъмат булун, мунал дакI диндалул чулухуннай тIитIин дувайссар». Исламрал тIалавшиннарду хъама диртсса чIумал жува байбишинтIиссару аьркин бакъасса давуртту дуллай. Мунияту, гьарца чIумал дакIний битан аьркинссар ва дин жучIанна диян дуваншиврул Идавсин ﷺ ва ганал асхIабтуран духIан багьсса аьзав-аькьувардая. Аллагьнайн ﷻ щукру буллан аьркинссар цIана бигьанна дин дуллансса каши жухьхьунна дуллунутIий. КъабучIиссар Исламрах супралий дирхьусса дукралух кунма буруглай, ва ласунна тамур къаласунна тIун», – увкуна имамнал.
Ккуллал райондалул имам МухIаммад-Маннар Бариевлул дакIнин бувтуна Аллагь ﷻ рязисса, МухIаммад Идавс ﷻ кIицI лаглагисса, диндалия бусласисса мажлисирттал азарвахъул оьккисса, духIин дакъасса тIуллу дуллалисса мажлисирттал бунагьру лиххан байшиву: «Лакрал Ислам цалчин кьамулгу дурну, цалчин кьадиртссар тIун бикIай. На мукун учайминнащал къарязиссара. Лакрал миллатрал дин кьакъадиртссар. Чансса хьхьара хьурчагу, хIакьинусса мажлисрал ва жува бувсса конкурсрал ккаккан буллай бур жучIара дингу, имангу, Исламгу душиву. Кьуръандалуву буссар укунсса мяъналул аят: “Зун Аллагь ﷻ ххирахьурча, МухIаммад Идавсил ﷺ ххуллийх бачи, зугу Аллагьнан ﷺ ххира хьунтIиссару”. Щак бакъа учин бучIир конкурсраву гьуртту хьуминнан Идавсгу ﷺ, Аллагьгу ﷻ ххирассар куну. Ва конкурс буван цалчинма сиптачину хьусса Ваччиял имам Дибир-хIажинахьгу хъунмасса барчаллагь тIий ура!», – увкуна М. Бариевлул.
Конкурсраву хьхьичIунсса 10 кIану бувгьуминнан пишкаш дуруна багьлул ххирасса бахшишру.
10-мур кIану бувгьуна Лакрал райондалиясса ХIусайнов Жамбулатлул. Ванал дурххуна мангъал.
9-мур кIану бувгьуна Гьущиял шяраватусса ХIажиев НурмухIаммадлул. Бахшишну хьуна смартфон.
8-мур кIану бувгьусса Ваччиял шяраватусса Рамазанова Радмилан пишкаш дуруна ссят Apple Watch.
7-мур кIану бувгьуна Гъумучатусса Оьмарова Разиятлул. Ванил бувххуна янна шюшай машина.
6-мур кIанттун лайкь хьуна Гъумучатусса Куяев Минкаил. Ванал бувххуна холодильник.
5-мур кIану бувгьусса Гъумучатусса Аюбова ХIабибатлул бувххуна телевизор.
4-мур кIану бувгьуна Ваччиял шяравасса Аьлиева Наидал. Ванил дурххуна телефон iPhone 13.
3-мур кIанттун лайкь хьусса Ваччатусса ХIажиева Шубанатлул дурххуна 150 азарда къуруш.
2-мур кIану ва 300 азарда къуруш дуллуна Щаратусса Оьмарова Сабинан.
1-мур кIану ва автомашина Hyundai Solaris бувххуна Гъумучатусса ХIусайнова Уммукусумлул.
Редакциялул чулуха барча буллай буру циняв хьхьичIунсса кIантту бувхьуми!
